Joglars, no·t desconortz
e vai t'en d'espero
– no i gartz agurs ni sortz –
vas lo rei d'Arago,
qe·m traga de preiso;
que ja, pois serai mortz,
no·m tenra dan ni pro.

No·i gart colpas ni tortz
en aquesta sazo;
e qan serai estortz,
si·m vol metr'ochaiso,
non a vassal tant bo
de Tortosa als portz
no·il torn son oc e no.

E no·n get Mon Marques,
ni·N Guillem de Clarmon,
ni·l Vescomt mal apres,
ni·l qart, si ven d'amon,
q'a totz dic ad un fron:
«Reis, anc no fi qe·us pes,
mas los maritz aon».

D'aqestz n'i a tals tres
c'ab lor moillers ai jon,
et abeurat cen vetz
mon caval a lor fon,
e passatz a lor pon
amdos mos palafres,
q'am mais que Agremon.

A·N Arnaut, mon cosi,
et a·N Hugo d'Aveu,
joglars, comta e di,
et a·N Bascol Romeu,
que pregon lo lur Dieu
lo bon rei palaizi
qe·m trag'o qe·m maleu.