Cel so qui capol'e dola:
tant soi cuynde e avinen
si que destral ni exola
no·y deman ni ferramen;
qu'esters n'ay bastidas cen,
que maestre de l'escola
so, e am tan finamen
que per pauc lo cor no·m vola.

Si Deus me don'alegranza
e gaug de mon Per-cabal,
tant hi ferray de ma lança
entre Qaresm'e Nadal
qu'En Lenga-moza-de-sal
n'aura enuig e pesança,
e tuit mei amich coral
n'auran gaug e alegrança.

Si mon caval trot'a lega,
no m'en fal, so·us assegur,
qu'en tal luec no l'acossega,
si no trop qui m'en atur.
Que no·y ha auzberch tan dur
que mon bran d'acer cossega
que jos la carn no·l pejur,
si a Deu merce no pregha.

Un'e doas e tres et quatre,
cinc e seis e set e uit,
m'avenc l'autrer a combatre
ab ma osta tota nuit,
e si·m trobes flac ni buit,
per la fe que·us dey, bel fratre,
io agra tost mon pan cuit,
e puis fora fins de batre.

Ma hosta no fo pas lota,
e parec o al montar:
si no·m tengues a sa cota,
viatz m'agra fait tombar,
c'axi·m fazia plombar
com si fos una pilota;
per que fay mal cavalgar
en bestia c'axi trota.