Trop ai estat sotz coa de mouton
que non chantiei de ma dompna Ma Sogra,
de la genssor que anc noiris en terra
bocha e front et huoils clars e rizens
..................
e, fe qe·us dei, midonz, la pros de Berga,
et acuoil gen e coindej'et alberga.

E no·us cuidetz q'ieu m'oblit lo cordon
qe·m det l'autrier de sa gonella groga,
per qe·l maritz et eu·ns mesclem de gerra,
don eu n'ai faitz mains bos envazimens
e mains assautz, don Mos Sogr'es dolens,
e·m cuidet dar l'ostal de Na Ramberga:
mieus fo·l gazains la nuoit, qui·s vol s'i perga.

E prec Ihesu q'ira ni mal no·m don,
ni gauch ni ben a·N Cogot de Savoga,
tro qe·ns veiam plan en comb'o en serra
rengat amdui ab totas nostras gens;
e parr'adoncs cals es lo plus valens
ni cals ferra mieills de sa schirimberga,
que non es jorns per s'amor non la terga.

Gen li pausiei los corns el capairon,
que tota ren pot hom dir mentre·is joga;
et al partir ac tal corneill'esquerra
que tornarai sans e sals e gauzens
a la meillor e que es plus valens;
e per m'amor prec li que non s'esperga,
qu'eu vauc vezer lo rei navar part Lerga.

A Mon Sogre trametrai ma chansson,
que par judieu q'iesca de sinagoga;
e porta la·m, qui no·t clau o no·t serra,
tu, Montanier, e non estias lens,
qe riran en cavalliers e sirvens:
tal mil dirant que Ihesus lo somerga;
c'usqex dira q'ieu meillur et enderga.

A vos m'autrei, bona dompna de Berga:
vos etz fins aurs, e vostres maritz merga.