Mais volgra chantar a plazer,
si pogues, d'autre trobador,
quar mais de plazer e d'onor
m'a fait, Dieu laus, Amors saber
qu'a nulh amador, so m'es vis;
e qui d'un sol mal me gueris
qu'ieu trac per lieys cuy mi suy datz,
fora totz mos joys esmeratz.

Aquest mal mi ve de temer
qu'ieu ai qu'elha·s camge alhor;
mas ieu non ai cor camjador
ni de camjar non ai lezer,
ans li suy tan leyals e fis
que mais la vuelh que paradis:
doncx, er ben enjans e pecatz
s'ieu suy per autr'aman camjatz.

Bona dona, sen e saber
avetz e tot'autra valor,
e Dieus don la vos ves amor
que·n sapchatz lo mielhs retener;
quar mielhs es qui d'azaut chauzis,
qu'azautz puej'amor e noyris,
e nulhs hom no·s te per paguatz
de re si no l'azaut'e·l platz.

Er aujatz quant a de poder
en amor, e quant hi acor
azautz: qu'om ne laissa melhor
que·lh faria tost son voler,
per meynhs bella, quar l'abellis
e quar mais d'azaut s'i es mis:
doncx, val mais azautz que beutatz
en ben amar, ni que rictatz.

Luec del marit volgr'ieu un ser,
e·l ser que dures de Pascor
entro la festa de Martror,
e·l maritz perdes lo vezer,
o sivals que ades durmis,
e que ja·l mons no·n fos devis;
e, si anc s'averet oratz,
Dieus, aquest me si'autreyatz!

Reys castellas, ans que no·us vis
m'en tornera de paradis;
s'ans del vezer lai fos intratz,
totz temps lai estera iratz.