Talans m'es pres d'En Marques,
no per anta ni per mal,
mas per desir natural
que m'en ven e per coratge,
qu'eu chan; e si m'es salvatge
qand pens de mon Per-cabal
que ja·n diga vilania
per enoi ni per feunia.
Mas qui sap far aitals motz,
aissi engals totz,
maestratz de cortesia,
non es hom en nuilla terra
plus chant d'amor ni de gerra.

Pero non ai tant apres
q'ancar non agues ops sal,
per q'a oras no m'en cal
s'om mi repta de follatge,
c'a fol presen fol messatge
deu hom trametr'atretal.
Per qu'ieu tenc tot jorn m'espia
a·N Marques de sa foillia:
non entenda·l joc de sotz
don es lecs e glotz;
mas ges eu no·l o diria,
que mals agurs ac part Berra
quan se frais la gamb'esqerra.

El tornei rengat e spes
a Saillfora el pradal,
n'aic lo bon elm, que tant val,
de Mon Marques, e·l teng gatge;
e dic vos q'a plan barnatge
·l derocarai al Carnal,
e car non l'i fi al dia
per la plaia que·il sabia,
m'o laissiei, per Sainta Crotz;
mas per doas notz
qe·m don puosc far garentia
qe·m pend'om en una serra
si·n faill so que mos cors n'erra.

La bocinada que pres
a Puoigcerdan me fo mal,
e la gran anta mortal
don fetz orguoill et outratge
de Pinos e vassalatge,
car el mainadier reial
despes tant laich sa feunia;
mas sempre·l vim de paria
del plus enic dels nebotz;
que de Col de Crotz
tro al Puoig Sainta Maria
n'a meins pretz per tota terra
aitan qant mars clau ni serra.

Arnaudon, mon sirventes
d'En Braz-cortz, Denz-de-boial,
Huoills-de-boc-en-fenestral,
apren, e met t'el viatge,
tro sias dinz el estatge
ad Aigaviv'en l'ostal,
lai on Raimon de Patz sia;
q'ieu prec que per m'amor dia
sirventes d'En Cais-de-botz,
si mal si'en poz
o negatz qui no s'en ria
o caitius pres d'En Balterra,
que sens aur hom non desserra.

Marques, tant co·us sapch'en terra,
ve·us camp e caval e gerra.