Mout m'es greu d'En Sordel, car l'es faillitz sos senz,
Qu'eu cuidava qu'el fos savis e conoissenz!
Era sui en mon cug faillitz, don sui dolenz!
Car tan onrat condug don'a tan avols genz
Con lo cor d'En Blacatz, qu'era sobrevalenz.
Aora lo vol perdre, en que faill malamenz,
C'aissi cum pert aquest, en perdria cinc cenz!
Mas ia no·i er perduz entrels flacs recrezenz!

Que las dompnas valenz lo partran entre lor
Et en loc de vertuz lo tenran per s'onor.
E midonz de Proenza, car a de pretz la flor,
Prena·n premieiramenz e·l gart per fin'amor.
Pueis midons de Bearn, car a vera valor,
Voill qu'en prend'atresi tan qu'en torn la dolor
Qu'il aura de sa mort, en gaug et en dousor,
Car tostemps enanset son pretz e sa lauzor.

La comtessa prezans dompna de Vianes
Voil que prenda del cor, pos a bon pretz conques!
E gart lo ben e gen per la vertut que·i es,
E penra·l tostemps ben, si·l gard', en totas res.
E·l bella de la Chambra, en cui sera ben mes,
Voil qu'en prend'atressi, pos a totz autres bes,
E gart lo enaissi com fai son cors cortes,
E no·l pot miels gardar, al laus dels ben apres.

Na Guida de Rodes prenda del cor, car fai
Sos bes grazir als pros e car toz bes li plai!
E gart lo ben e gen, car ad ella s'eschai,
Que, si tot il val pro, tostemps en valra mai.
Na Rambauda del Baus prenda del cor assai,
Car il es bell'e bona et a bon pretz verai,
E gart lo ben e gen, car tot quan gen l'estai
Garda, salvan s'onor e son plazen cors gai.

Sil de Lunel, car a verai pretz cabalos,
Voil que prenda del cor, c'aissi·s taing per ambdos,
Car ill es bell'e bona e·l cors plazens e bos,
E gart lo ben e gen et aura·n grat dels pros.
Pueis voil que del cor prenda la bella de Pinos,
Car il es bell'e bona et a plazenz faissos,
E gart lo enaissi, car sos cors amoros
Tenra·l vertutz del cor tostemps gai e joios.

De l'arma d'En Blacatz pes Dieus lo glorios,
Que·l cors es ab aquellas de qu'el er'enveyos.

Bell'Esmenda plazens, sol que Dieus mi sal vos,
Cui que plass'o que pes, tostemps viurai joios.