No cugiey mais ses comjat far chanso!
Mas ar m'ave, mal grat mieu, far parer
Lo pensamen q'el cor no·m pot caber,
Tan m'en a dat silh a cui ieu me do.
Per q'ieu comens, a ley de cossiros!
E si mos chans non es molt amoros,
Ia non rept'om mas amor e merce,
Quar si·m volguesson portar bona fe
Ia no si·m feira midons tan estranha.

A penas say que·m sia mal ni bo,
Tan suy marritz e ples de nonchaler!
Car s'ieu del tot d'amor mi dezesper,
Ges per aitan non hiesc de sa preizo.
Que farai doncx suffrirai pezansos,
E atendrai tro que venha sazos,
Que·l dezamat suffren trobon merce!
E no dirai: s'autre pro noqua·m te,
A tot lo meyns midons que mi remanha

Ai, fin'amors, ab tan pauc guizardo
Pogratz mon cor en gran ioya tener,
Sol que fezes a lieys cuy am saber
De quan bon grat me mezeus l'abando!
e si d'aitan no voletz neus mos pros,
Sivals que no mostratz li qui etz vos.
Mas noi anetz que noy menetz Merce,
Qu'adoncx seran aiustat tug li be
E sobrar l'an a qui que d'elhs sofranha.

De mon dan cug, amors, q'ieu-s muou tenso,
On plus vos dic qu'anetz mi dons vezer!
Q'ades la vey ses vos aitan valer
Que mais non cug m'escoutes a razo
Pus aura fait son cors de ren ioyos!
Que sa beutatz mi fai aissi duptos,
Q'umilitat, chauzimen e merce
E vos mezeusa per pauc no mescre
Qe·us des erguelh, si·us vol en sa companha.

Mas nopertan endreit vos la somo,
Qu'al sieu servir mi denhes retener!
E s'a lieys platz qu'ieu aia nul plazer,
Membre li d'oc e oblit li de no!
E s'ieu sui fols no·m fezes enuios!
Renda·m merces aquo que·m tol razos,
Quar s'ieu no puesc ab lieys trobar merce,
Cuy am e vuelh e dezir mais que re,
No sai vas qui de ma dolor mi planha.

A Fol Conselh t'en vai ades, chansos,
E diguas li q'ieu no truep sai merces
Ab Joy Novelh, si Mals Aips no-m capte,
A cui m'en torn, pos tan gen mi guazanha.