Qui finamen sap cossirar
Lo dous dezir, lo dous pensar,
Que fis cors a per fin'amor
Finamen ab fina sabor,
En fin'amor si deu fizar.
Amors vens tot'autra doussor.
Quals amors silh que tot perpren,
Ses fin e ses comensamen.
Dieus es fin'amors e vertatz!
E qui Dieu ama finamen,
Finamen es de Dieu amatz.

Totz hom qui ben pot afinar
Son cor en Dieu, e desamar
So que Dieus ten a desamor,
D'amor sent aissi bon'odor
Que nulha res no l'es amar.
Amar deu hom ben tal senhor
Que nostra mort aucis moren:
Vencutz d'amor, venquet sufren.
Finamen amet desamatz.
Elh es qi·l ben d'amor enten:
Amors part totas amistatz.

Bos es e vol sos bes mostrar!
Sos bes als bos no vol celar.
Del mal fai bon, del bon melhor!
Be fai al bon, neys al pejor
Fai be, quar totz los vol salvar.
Qui be vol prec lo salvador,
Quar elh es cel bes veramen
Que mena·ls bos a salvamen.
Elh es salutz e salvetatz,
Bes sobre·ls bes! qui tal guiren
Aura, per lui sera salvatz.

Dompna, tu non aguist anc par,
En cel, en terra ni en mar,
Verges, maire del salvador,
Totz pretz val part tota valor
Apres selh qu'om no pot prezar.
Honrada sobre tot'honor,
Tal rei onratz onradamen,
Lo rei dels reis qu'aissi granmen
Per conort a nos totz onratz.
Apres lui e ses tot conten
Trastotz los gras d'onor montatz.

Al tieu laus no pot laus montar.
Quals laus si pot al tieu levar,
Que de totz laus portas la flor
Lo tieus laus fai lauzar lo lor
De selhs qu'an cor de te lauzar.
Pel tieu laus aug Dieus la lauzor
De selh qu'en te lauzar s'empren.
Lo tieus laus es sieus eissamen!
Del tieu laus se ten per lauzatz!
E qui te lauzon leyalmen
Ab Dieu es lor cors aloguatz.

Lo solelhs clars fai lo jorn clar!
Mas sa clardatz enluminar
No pot lo jorn per sa clardor
Si com tu·l cor de peccador!
Quan be lo denhatz reguardar,
Dieus qual clartat, qual resplandor
Rics es qui la ve e la sen.
Sentir non sent us entre cen.
Per que quar cossen a peccatz.
Qui peccat sen, pueis i cossen,
No sen Dieu ni ve sas clardatz.

Qui novelh chan volra chantar,
Chant chan de Dieu ses deschantar,
Qu'el no vol autre chantador.
Tug autre chant tornon a plor.
Dieus don que no·l puesc'enchantar
Enchans de mal enchantador
Qui cest chan chant'alegramen!
E qui·l chantet premeiramen
Totz tems chant el d'alegratatz!
Don en chantan mon chan prezen
A vos, on que sia chantatz.

Qui cest chan chantara soven,
De Dieu sia benauratz
Diguatz amen tug ben-volen,
Que selh vos am cui vos amatz