Dous'amiga no·n puesc mais,
Mout me pesa qar uos lais
E..........esmais!
E teng m'o a gran pantais,
Qar no·us abras e no·us bais
E departen nostr'amor.

D'aitant sabchas mon talan,
Qe anc femna non amei tan,
E no·us en aus far semblan
Ni trob per cui uos o man!
Vau m'en! a dieu uos coman,
Al espirital seinhor.

Non puesc mudar qe no·m plagna,
Qar se part nostra compagna!
Eu m'en uauc en terra estragna!
Mais am freidura e montagna
No fas figa ni castagna
Ni ribeira ni calor.

Lai s'en uai mos cors marritz,
E cai reman l'esperiz!
Et ai tant los uls froncitz
Qe m'en dolon las raitz!
Mal o fai qi·ns a partitz,
E non puesc auer baudor.

Sans e sals fora eu gueritz,
Qant serai acondormiz,
Si fos de leis tant aisiz,
Q'en semblant d'una perniz
Li baises sos oils uoltitz
E la fresqetta color.

Dous estars lai m'es ardura,
E bons conortz desmesura,
E saziontas fraitura,
E dias clars noitz oscura!
Per mon iouent qar peiura
Ai marriment e dolor.