Verges, en bon'hora
portes lo Salvaire,
que selh vos honora
e'us fai joia faire,
e'l pobol que fora
liuratz a mal traire
vos pregues ahora,
santa plazen maire ;
quar d'ir'e d'esmai
e de tot esglai
guardatz lo pus laire
que vas vos s'atrai.

Domna doussa, e bona,
humil, de bon aire,
ajud'e perdona
ad aquest peccaire ;
guarda ma persona
d'ant'e de mal faire,
e m'arma razona
ab lo tieu car paire ;
que'ls peccatz qu'ieu ai
fatz ni ditz ni sai
no'puescan mal faire
quan del segl'irai.

De gracia plena
avetz nom Maria,
car getatz de pena
cui merce vos cria ;
liam ni cadena
no'l te ni'l tenria
pus qu'ab quarantena
gen vos humilia ;
penedensa fai
hom just e verai,
e per aital via
va senes esmai.

Regina d'auteza
e de senhoria,
la vostra franquesa
a'l mon en bailia ;
de tota boneza
etz roz'espandia,
car en vos s'es meza
gracia floria,
aissel frug verai
qu'intret ab lo rai
- en vos, dona pia,,
quan l'angel venc sai.

Verges, en efansa,
nasquet lo dous sire
de vos ses duptansa
de qui sui servire ;
la sua pitansa
ma fissa jauzire
ah gran alegransa
del bes qu'ieu dezire,
car gran dezir ai
qu'ieu fos el renc lai
senes tot cossire
on sanh Peir'estai.