Perdigons, vostre sen digatz :
que'us par de dos maritz gelos ?
l'us a moller qu'es bella e pros,
franca e cortesa e chausida,
e l'autre laida e marrida,
villana e d'avol respos ;
quascuns es gardaire d'ambos :
e pas tan fols mestiers lor platz,
ni aital es lor voluntatz,
quals en deu plus esser blasmatz ?

Gaucelm Faidit, ben vuelh sapchatz
que de dompn'ab bellas faissos
don totz lo mons es enveios,
qui l'a pres de si aizida,
non fai ges tan gran fallida,
si la garda e'n es cobeitos,
cum l'autres desaventuros
qu'es tan de totz mals aips cargatz
qu'en gardar no'l forsa beutatz
ni res mas laideza e cors fatz.

- Perdigons, en fol razonatz ;
e com auzetz anc dire vos
qu'om tenga so qu'es belh rescos
ni qu'om gart domna eissernida,
bella, de valor complida ?
Doncs non la garda sos sens bos ?
Mas la laida ab digz enoios
deu gardar lo maritz senatz,
per qu'om no veia sas foudatz
ni cum el es mal molleratz.

Gaucelm, entrels nescis agratz
gent cubert blasme vergoignos ;
pero mal cossellatz l'espos
quan disetz qu'aia tal vida
que gart sa mala escarida
ni fassa d'un malastre dos ;
mielhs a de gardar ochaizos
bona dompna on es granz beutatz,
don par qu'om sia enamoratz,
e'n deu esser menhs encolpatz.

Perdigons, on plus en parlatz,
plus desmentetz vostras chansos,
que gelosia es fols ressos,
don totz lo mons brai'e crida
que hom gart dompna eissernida,
et es lagz blasmes entre nos :
mas l'autres gardars es razos
ses gelosia e ses peccatz,
qu'om resconda so qu'es malvatz,
e mostre so dont es honratz.

Gaucelm, s'avol aver gardatz,
d'avol thezaur etz poderos ;
e no par ges sens cabalos
qui pretz pert e joi oblida
per malvaiza cauza aunida ;
mas quan per bel aver joios
falh ni trebalh'en a sazos,
d'amor par que sia forsatz.
e si d'aquo'us meravilhatz,
be'm meravilh si vos amatz.

Totz temps duraria'l tensos,
Perdigons, per qu'ieu vuelh e m platz
qu'el Dalfin sia'l plaitz pauzatz
qu'el jutge e l'acort en patz.

- Gaucelm, tant es vera'l razos
qu'ieu defen e elh tan senatz
que, s'en lui es lo plaitz pauzatz,
vuel que per lui sia jutjatz.