Mais no m cug que sons gais
ni motz plans ni ginhos
sapia far, quar l'esmais
e'l sospirs angoissos
d'amor m'an si camjat
e'l saber esserrat
que res no sai que'm dic ;
eissi mi notz paors
en aquestas errors
e desirs e volers
e cujars e temers.

Pero no'm ditz volers,
sitot si'm venz folors,
qu'eu de totz mos dolers
fass'a mi dons clamors ;
car per aisso m'en gic
qu'aug dir qu'anc no's jausic
drutz d'amor a celat
qui's fezes trop cuchos
ni's demostres gelos ;
mas ab totz los esglais
puin con ab jois m'apais.

Ni convinentz ni plais
que si'entre nos dos
no'l cug querre ja mais,
si be'm viu cossiros,
que'l brau respos irat
ab semblan de comjat
on per pauc no moric
m'an mes en tals temors
que no m'es mais sabors
de nuils coventz querers,
que'm remembr'aquel sers.

Anz lais als seus plazers
mas gaugs e mas dolors,
mas ja'm par desespers
lo desirs e l'amors
qui'm parec, can plevic
que'm fezes de joi ric ;
pus en tan gran desgrat
no's tenc cel qu'es cochos
de so don muir'aissos,
qu'ab tals covens m'estrais
qu'anc leials cors no frais.

Si'l ditz non es verais,
don es ma sospeissos,
solatz e chantar lais
e totz faitz amoros,
car en sa segurtat
m'aura mort e sobrat
cil qui m'a fin amic,
si'm tarda'l seu socors ;
qu'amics, qu'ilh tan aut sors
e'l tol sos bos espers,
mor d'aquels mals sabers.

De lui on es pretz vers
e complida valors,
tem que's luin mos vezers
per fais lausengadors,
on escobre l'esdic
e mon senhor chastic,
n'Uc, que Dieus ten honrat
sobre'ls autres baros,
que's gard de lurs sermos,
qu'a lor es honor fais
et avolesa jais.