Ir'e pezars e dompna ses merce
m'an tolt solatz e chantar e deport,
e s'ieu pogues alonguar aital mort,
hie'm n'anera, mas sabetz que'm rete ?
On pus me luenh, on pus m'auci e'm te,
e pus non truep mas captienh ni senhor,
hie'm prenc ades ab ambas mas lo fre
e remanrai ses merce ab Amor.

Totz mos chantars lais, qu'anc no'm feron be,
et ab tot joi m'azir e'm dezacort ;
aissi cum naus cui vens men'a mal port,
m'a mal'amors menat, no sai per que ;
quar s'ieu portes a Dieu tan lial fe,
el m'agra fag plus aut d'emperador,
e qui ama mala dompna ni cre
luenh es de joi e pres es de folhor.

Lo cors es ars mas eras no'm reve ;
e ja no's cug qu'ueimais aital fais port,
qu'aissi li lays e non ges al mieu tort ;
e no mi cal guiren, qu'ilh o sap be ;
e pus servirs ni preyars pro no'm te,
fols serai hieu si mais sospir ni plor,
quar res no sai per qu'aisso m'endeve,
mas quar no sai de cassa ni d'austor.

Mas manhs afars que no'l costera re
pogra mi dons tornar al mieu acort ;
mas ja de lieys no vuelh aver conort,
per que'm deslonh de s'amor e'm recre,
tant qu'ieu n'azir la terra que'm soste,
quar er en fas a tot lo mon clamor,
mas jauzimen m'o tol, quan me sove
que maldire non tanh res ad amor.

E'l ricz noms cars que ab lieys no s'ave
a bon castelh ferm e segur e fort
......
don datz es tortz a cui lo bes cove ;
e si d'aquest castelh joi no m'ave
ja dieus no'm do qu'elh me venha d'albor,
quar tot quan tanh a bon pretz lo mante ;
veus las armas que defendon la ator.