Tot l'an mi ten Amors de tal faisso
cum estai cel qu'a'l mal don s'adormis
e morria, dormen, tant es conquis,
en breu d'ora, entro qu'om lo rissida ;
atressi m'es tal dolors demezida
que'm don'Amors que sol no'm sai ni'm sen,
e cuich morir ab aquest marrimen,
tro que m'esfortz de far una chanso
que'm rissida d'aquelh turmen on so.

Ben fetz Amors l'usatge del lairo
quand encontra cellui d'estranh pais
e il fai creire qu'aillors es sos camis,
tro que li di : " Bels amics, tu mi guida " ;
et enaissi es mainta gens trahida
que'l mena lai on puois lo lia e'l pren ;
et eu puesc dir atressi veramen,
quez ieu segui Amor tan que'l saup bo,
tant mi menet tro fui en sa preizo.

E te'm lai pres on non truep rezemso
mas de ma mort, qu'aissi lor abelhis
entre mi dons et Amors cui sui fis ;
lor platz ma mortz et lor es abelhida ;
mas eu sui cel que merce no lor crida
plus que fai cel qu'es liuratz a turmen,
que sap que plus no lh valria nien
clamar merce, aia tort o razo ;
per qu'eu m'en lais que mot no lor en so.

Pero no sai cal me fass'o cal no,
pus per mon dan m'enguana e'm trahis
Amors vas cui estau totz temps aclis
al seu plazer, qu'aitals fo m'escarida ;
e tengr'o trop a paraula grazida
si: no'm mostres tan brau captenemen ;
mas se aunis pel mieu dechazemen ;
ben fai semblan que m'aja cor fello,
que per mon dan non tem far mespreizo.

E fatz esfortz s'ab ira joi mi do,
quar en aisso'm conort e m'afortis
contra'l dezir en qu'Amors m'a assis,
aissi cum selh qu'a batalh'aramida,
que sap de plan sa razos es delida
quant es en cort on hom dreg no'l cossen,
et ab tot so se combat eissamen,
me combat ieu en cort on no'm ten pro,
que Amors m'a forsjugat, no sai quo.

Ai ! Bel Esper, pros dompna eissernida.,
tant grans dregs es si d'amor mal m'en pren,
quar anc de vos mi parti, las ! dolen
per cel'una que ja no m tenra pro,
ans m'aucira en sa doussa preisso.