Trop ai estat mon Bon Esper no vi,
per qu'es ben dreitz que totz jois me sofranha,
car ieu me luenh de la soa companha
per mon fol sen, don anc jorn no'm jauzi ;
mas sivals lieis no costa re,
que'l dans torna totz sobre me,
et on ieu plus m'en vau lonhan,
meins n'ai de joi e mais d'afan.

Si ma foudatz m'enguana e m'auci,
ben es razos que ja hom no m'en planha,
qu'ieu soi com selh qu'en mieg de l'aigua's banha
e mor de set ; et es dreitz, so'us afi,
qu'ieu mueira deziran del be
qu'eu aurai dezirat ancse,
et agra'n tot so qu'ieu deman
si quan fugi'm traisses enan.

Grans merces et qu'ieu morrai enaissi,
car estau sai marritz en terr'estranha,
don ai assatz que plor e que complanha,
car no vei lieis que de mort me gueri
e'm trais de ma mala merce ;
ailas ! quals peccatz me rete,
que s'agues mortz estat un an,
si'l degr'ieu pueis venir denan.

Si'm sent mespres que res no sai cossi
an denan lieis ni no sai com remanha,
quar qui so fai a senhor que no's tanha
quant hom l'a ric, bon et lial e fi,
paor deu aver, quan lo ve,
que perda son senhor e se ;
e s'ieu pert lieis cui me coman,
perdut ai me e joi e chan.

Perdre la puesc, qu'ilh non perdra ja mi ;
qu'eis lo jorn vuelh mai que mort me contranha
qu'ieu ja mon cor departisca ni franha
de lieis en cui tan fermamen s'assi,
qu'en tot autr'. afar me mescre ;
mas tant la truep de bona fe
que'l cor e'l saber e'l talan
i truep acordatz d'un semblan.

Selh que ditz qu'al cor no sove
d'aiso qu'om ab los huelhs no ve,
li miei l'en desmenton ploran
e'l cor planhen e sospiran.

Belhs Rainiers, de vos me sove
et de mi don mas d'autre re,
e quan no'us vei, cug far mon dan,
e muer per mi don deziran.