Ben aio'l mal e'1 afan e'1 consir
qu'ieu ai sufert lonjamen per amor ;
que mil aitari m'en an mais de sabor
li ben qu'Amors mi fai aras sentir,
que plus mi fai lo mals lo ben plaser ;
que semblan m'es que si ja mais no fos
ja negus bens no fora saboros ;
donc es lo mais melhuramens del be,
per qu'usquecs fai a grazir quan s'ave.

A fin'Amor grazisc lo douz dezir
que'm fai estar en tant fina doussor,
que non es mals don eu sentis dolor,
si totz lo mons me jutjava a morir ;
et aia'n grans merces, car fetz voler
a la bella de cui fatz mas chansos
qu'a lieys mi des, car anc tant no'm plac dos ;
quar qui'm dones tot lo mon per jasse,
no'm plagra tant cum quan li donei me.

Qu'en amador pogr'il ben avenir,
tan a de pretz, de sen e de valor,
on se trobera trop mais de ricor ;
mais als auctors ai ancse auzit dir
qu'en ben amar em chascuns d'un poder,
et hom paubres fai hi melhurazos,
quant es de sen, contra'1 ric cabalos,
qu'aitan quan sap meins de valor en se
tant grazis mais qui l'honra ni'l mante.

Quar fin'Amors no manda ges chauzir
comte ni rey, duc ni emperador,
mas fin amic e ses cor trichador
franc e leial e que's gart de falhir ;
e qui no sap aquestz ayps mantenir
paratge aunis e si mezeis met jos,
car ad amor non es valens ni bos ;
qu'en paratge non conosc eu mais re
mas que mais n'a cel que mielhs se capte.

Fis jois honratz, pois tant vos faitz grazir
per amor Deu aissi doblatz l'onor
que'm retenguatz per leyal preyador,
e no vulhatz escoutar ni auzir
fals lausengiers, quar en joi dechazer
ponhon totz temps, tant son contrarios,
e vos faitz lor morir totz enveios ;
si co'l pechat estenh hom ab merce,
estenhetz els, quar per els no m recre.

Aitan sapchatz, s'ieu ja ren cug valer,
mos senher n'Uc del Bautz, qu'es envejos
de tot quan tanh a fin pretz cabalos,
m'o fai cujer, qu'ab tal gaug mi rete
cum s'er'ieu pretz qu'el ama. mais que re.

De Monpeslier vai ben a mon Plazer,
qu'el seigner es francs e humils e bos
et en sos faitz es d'aitals guizerdos
qu'el honra Dieu et tot bon pretz mante
per qu'el lo creis e l'enanssa e'1 soste.