Los mals d'Amor ai eu ben totz apres,
mas anc los bes no puec un jorn saber,
e si no fos qu'ar ieu ai bon esper
ben cujera que no n'i agues ges ;
et agra dreg qu'eu los desesperatz,
tant ai amat et anc no fui amatz ;
pero si'l bes es tan dous e plazens
quom es lo mais engoissos e cozens,
anz vuel murir qu'eu ancar non l'atenda.

Atressi'm cug que'l mortz mais me valgues
que vida sai tostemps ses mon Plazer ;
e doncs m'es mielhs que mueir'en bon esper
qu'aia vida que ja pro no'm tengues ;
qu'assatz es mortz totz hom que viu iratz,
a cui non es jois ni plazers donatz ;
eu sui ben cel que negus jausimens
no'm pot dar joi per que sia jausens
tro qu'a mi dons plassa qu'a merce'm prenda.

E s'ieu per so sui forfaitz ni mespres
quar sol vos aus dezirar ni voler,
jes per tot so no m tuelh de bon esper,
que major tort perdona, ben Merces ;
pero si'l tortz mi fos a dreg jutgatz
non cujera tan esser encolpatz ;
mas vencutz es tot so que forza vens,
que negus dreg no i pot esser guirens,
per que m'es ops que Merces me defenda.

La grans beutatz e'l valors qu'en leis es
e tuich bon aip que dompna puesc'aver
mi fan ades estar en bon Esper ;
que so non cuich que ges esser pogues
que lai on es totz autres bes pausatz
que no'i degues esser Humilitatz ;
so'm fai sofrir mas dolors bonamens,
qu'Humilitatz, Merces e: Chausimens
m'en pot va,ler sol qu'a midons s'enprenda.

Eu et Amors em d'aital guis'enpres
qu'ora ni jorn, nueg ni mati ni ser,
no's part de me ni eu de bon Esper ;
que mort m'agra la, dolors, tant greus es,
si'n bon Esper no'm fos asseguratz ;
pero mos mals no'n es en re mermatz,
que bas Espers m'aura fag longamens
estar marriz et en grans pessamens
et ancar tem que plus car no m'o venda.

Mas s'ieu un jorn fos amics apelhatz
de tant bon cor quom ieu li'm sui donatz,
a la bella don no'is part mos talens,
anc tant Amors no'm destreis malamens
qu'en eis la jorn no'm agues fach esmenda.

[Vas n'Azimans vuelh, chanso, que tengatz
et a'N Tostems, car lur seretz plazens ;
mais non tenhatz entre las avols gens,
car qui mais val, crei que mielhs vos entenda.]