Totztemps auch dir q'us jois un autre adutz,
Per que non voill nuill temps de joi partir,
Q'ab joi fui natz et ab joi, on qe·m vir,
Soi et serai, q'aissi·m soi captengutz;
E si·l fin joi de lei en cui enten.
Q'eu plus aten,
Pogues aver, ben fora plus joios;
Que dobles jois es rix e cabalos
E qi joi sec jois li ve ses doptansa.

Per q'eu me soi autrejatz e rendutz
A fin'Amor et a lei cui desir,
Que finamen m'an fach mi oill chausir
La bella q'es flors e mirailz e lutz
E caps e guitz de tot ensegnamen;
E pos tan gen
Nafret mon cors d'un esgart amoros,
D'al no·m soven ni no·m fo saboros
Nuilz altre bes ni d'al non ac membransa.

Bona domna, vostre rix pretz saubutz
E las faissos e·ill plazen acuoillir
E la bocha don tan gen vos vei rir
M'an tan sobrat qe soven deveing mutz
E la on cuch gent parlar pert lo sen;
Q'ab espaven
Qer hom ric do, per qu'eu soi temoros;
Mas eu auch dir q'hom savis, a sazos,
Conqer mainz bes sofren ab esperansa.

De vos amar non serai recrezutz,
Anz m'abelis mil tanz qu'eu non sai dir;
Et si·us plagues c'o volguessetz sofrir
Q'eu vos ames, ja non fora vencutz
De vos servir mos fis cors leialmen;
Anz m'er parven
Q'engals sia l'afanz de nos amdos;
Et er merces, si de tan m'es faitz dos,
Qe mos volers no·s fraing ni no·s balansa.

Mas fis amanz no·s taing qe leve brug,
Ans deu son cor celar et escondir,
E·l ben e·l mal qi·ll ve d'amor grazir;
Q'ab certes aibs es hom per pro tengutz;
E qe·s gart be de far tot faillimen
Ab escien,
Qe de bon luoc ave bos guierdos;
Qe si domneis e cortejars non fos,
Non fora pretz ni servirs ni honransa.

Domna, per so·m sui a vos atendutz
Qe·m detz conseil, q'a pauc no·m fan morir
La fin'amors q'eus ai e·ill greu sospir;
E si mos cors fos per vos conogutz,
Be m'es semblan que n'agratz jausimen,
Qe no consen
Nuill'altr'amor, ni ma bona razos
No·m pot sebrar ni delonhar de vos,
Tan m'es el cor vostra gaia semblansa.

Pretz e valor, beltat, joi et joven
Ses faillimen,
E toz bos aibs, totas belas faissos
Ha Na Beatritz d'Est, q'anc non er e fos
Don'ab tant bes ses tota malestansa.