Pos vezem boscs e broils floritz
E·il prat son groc vert e vermeil,
E·l chant e·l refrim e·l trepeil
Auzem dels auzellos petitz,
Be·s taing c'un novel chan fabrec
En aquest bel douz temps d'avril;
E si be so·ill mot maestril,
Leu seran d'entendr'a unquec.

E quar non trop gair on desplec
Mon ferm natural sen sotil,
Per tan non clam mon saber vil,
Sitot enquer grans non parec;
C'aissi com si trobav'escritz
Bons motz, tan gen los appareill
Que no·m par que ja trop pareil
Qu'en chantan formes meillors ditz.

Mas uns gens cors, francs e grazitz,
C'anc tan bels no·s vie en espeill,
Per cui pes e fremisc e veill,
M'es e mon cor tant abellitz
Que d'alre servir no m'embrec
Mas ma domna franqu'et humil;
Per qu'eu ses tot enjan m'apil
Ens'amor que·m ten cobes lec.

Anc om en ben amar non crec
Tan con en midonz, don m'apil
En leis servir, c'ab un pauc fil
M'a pres e cug qu'e[n] pauc m'eisec;
Mas ges non tem parliers ni critz,
Tant esper son liai conseill;
E si·l platz qu'ella m'aconseill,
Gen serai de fin joi garnitz.

Ades es lai mos esperitz
On il es, don non meraveill;
C'aitan con fer rais de soleill,
Non es tan de bos aips complitz
Nul'autra ni par c'ab leis s'ec
De beutat, s'eran d'autras mil;
Don prec midonz que no m'avil,
Se mos cors vol mais que non dec.

Per ma domna maigrisc e sec,
Car son gen cors format gentil
Non vei; e fora mortz de gil
Tro qu'un pauc mos cors s'esperec.