Pessamen ai e cossir
D'una chanso faire
Qu'a lieys denhes abelhir
Cuy suy fis amaire;
E s'ieu pogues avenir
En bos digz retraire,
Far pogra saber
Que ieu plus fin joy esper,
Que nuls natz de mayre.

Lo cors e·l sen e l'albir
Ai mes e·l vejaire
En lieys honrar e servir,
Quar es la belhaire
Qu'om pogues el mon chauzir,
Don no·m puesc estraire
Ni mon cor mover;
Qu'Amors me fai tan temer
Lieys qu'als non am guaire.

La fina vera valors
Plus d'autra valensa,
E·l pretz, e·l fresca colors
Me platz e m'agensa:
Que si me valgues Amors
Tan que m'entendensa
Mi dons abelhis,
Plus ric joy que Paradis
Agr'a ma parvensa.

Nulh'autra no·m pot secors
Far ni dar guirensa;
Et on plus en sen dolors
Plus n'ai sovinensa;
Mas ges dire mas clamors
No l'aus per temensa;
Tan li sui aclis
Qu'on plus vas me s'afortis,
Mai l'am ses falhensa.

E fora li benestan
Si·m des alegransa,
Tan qu'aleuges mon afan
Ab douss'acoindansa:
Qu'ieu li suy senes enguan,
E non ai membransa
D'als, mas quom fezes
Tot so qu'a mi dons plagues;
Pero pauc m'enansa.

Qu'ades m'en vauc meluyran
On plus n'ai pezansa
Vas lieys, e suefri mon dan
Ab bon'esperansa;
E doblera mon talan
Sil belha semblansa,
Gentils cors cortes,
Si·t prezes de me merces
O qualsque pitansa.