Era pus hyverns franh los brotz
E pareysson florit li ram,
E·l gibres e·l neus son a floxs
Pels termes e pels playssadencx,
Be·s tanh [doncs l] qu'ieu me lueng d'enueg.
Chantan e no pareys ges pecx,
Sitot s'es braus et enuios lo temps,
Pus d'aitals digz sai far chanso ni vers.

Ben sai parelhar e far motz
Plas e clars, d'un semblan d'estam;
Mas que val? qu'eras non es locx,
E·ls tersols mal azautz ramencx
Be sai que son de bon art vueg,
De trics qu'an afilatz lurs becx;
E·ls pros cortes [adreg I] fan plors e gems,
Quar pretz es mortz e cazuts en evers.

Jurar vos puesc per Santa Crotz
Qu'un non vey que pretz entier am,
Que d'avareza·ls art lo focx;
E tug lor fait son de fadencx,
E mant hom pert lo gran e·l glueg;
Doncx per que·s fai quecx sorts ni secz
Pel mal [astre I] que los te vuetz e sems
De tots bos ayps don elh van ras e ters?

Ah! Malvestatz, non prendas totz
Los ricx baros en ton liam,
Ni Malespina ges non tocx
Per ren, qu'ans t'es ben mielhs que·t trencx,
Qu'a totz jors vuelh que sos bes pueg.
E doncs, Valors, ja no l'abnecz.
Quar ieu aug dir que totz bos faitz essems
Renhon ab lui, per qu'es bes si·ls sufers.

D'aver la bella suy tan glotz
Cui pessan dezir, don ai fam,
Que no·m platz tan nul autre jocx;
Ni no vuelh aver Foys ni Brencx,
Si·lh platz que no·m meta en refueg
Tan cum lieys; e si mos fis precx
No·m val, mal fas, Amors, quar aissi·m prems,
Que fis amans adreitz sui totz convers.

E pos tan fort mas nien consecs,
Be·m deurias far un ben calque temps
Entre.C. mals, que del dan tu·m malmers.