Ara pot ma domna saber
qu'anc no chantei ni aic joi ni solatz
pel temps d'estiu ni per las flors dels pratz
qu'ela sap be que mais a de dos ans
qu'eu non chantei ni fon auzitz mos chans
tro qu'a leis plac que per son chauzimen
volc qu'eu chantes de leis celadamen
per qu'era chan e m'esfors com pogues
so far e dir qu'a l'avinen plagues.

E cel que son pauquet poder
fa volontiers no·n deu esser blasmatz
ab que del plus sia la volontatz
e l'acolhirs e·l gaugz e·l bels semblans
e que sia leials e fis amans
e qu'en un loc aia tot son enten
cel qu'aitals es val mais mon escien
ab ops d'amar non fai ducs ni marques
car sa ricors cujaria·l valgues.

Aitals vos son ab ferm voler
bona domna de fin cor so sapchatz
e·m son per vos domna tan melhoratz
que trastotz vius e sans e gen parlans
m'era del tot recrezutz derenans
tro·m venc en cor domn'ab cors convinen
qu'eu·s enquezi don fi grant ardimen
anc mais no fi ardit tan be·m prezes
car gazanhar posc e perdre non ges.

Pro gadanh car me datz lezer
bona domna qu'eu chan de vos ni·us platz
e si del plus domna m'enansavatz
vostre mezeis seria totz l'enans
car ben petit de ben for'a mi grans
e·l gran benfach penria eu eissamen
e rendria·l guizardon per un cen
non ges tan ric com a vos convengues
mas per totz temps n'estari'ab merces.

E si merces no·m pot valer
ab vos domna qu'us messatgiers privatz
parles per mi qu'eu no·n sui azinatz
s'eu n'ai passat un pauc vostres comans
perdonatz me bona domna prezans
qu'eu vos tramis un messatg'avinen
mon cor l'autrier que·m laisset en dormen
ab vos remas domna et ab vos es
de bon loc moc mas en melhor s'es mes.

E ja domna non volh aver
ab mi mon cor mais am que vos l'aiatz
car anc un jorn non poc estar en patz
tant ai en vos pauzatz totz mos talans
e pois.........en
mal estera s'era merces no·us pren
e·s met en vos pois sabetz veramen
cals es vas vos la mia bona fes
o cal afan trai cel qu'amors a pres.

Na Maria be·us deu amar mos chans
que a la fin e al comensamen
se daur'ab vos e ab mais de plazen
per vos val mais Ventadorn e Tornes
.........es.