S'ieu anc jorn dis clamans
Encontra vos, Amors,
Orguoill ni desonors,
Ara·m dei e mos chans
Humiliar dos tans
E laissar mas clamors,
Pois ma dompn'Elionors,
La pros reïna prezans,
O deign'enaissi voler ;
E sitot ieu de vos grat non esper,
Be'us dei grazir lo dan e·l mal,
Puois ill m'o manda que tan val.

Humils e merceians
Mi rend a vos, Amors,
Car mi forset errors
E·ill lenga malparlans
Qu'ie'us fos contrarians
Ab digz maldizedors,
Et ieu vos dirai lauzors
Et de plazers cent aitans
Que non vos dis desplazer ;
C'orguoills s'ai ben que no m·i pot valer,
Per c'oimais d'enemic mortal
M'auretz amic fin et leial.

Qu'ie'us vencerai enans
Merce claman, Amors
Ab precs et ab temors ;
Que s'ieu ab braus semblans
Vos era contrastans
Ni'us dizia folors
Ab fais digs reprendedors,
Et si mos leugiers talans
Mi fetz orgoillos parer
Encontra vos ni dire non-dever,
Ben dei far penedensa tal
Cum taing a forfaich desleial.

Sabetz cal ? Als mieus ans
M'er totz temps mais, Amors,
Doussa ma greus dolors
E bes e pros mos dans
E sojorns mos affans
E gabs e ris mas plors
E mos loncs trebaills legors
E totz mos destrics enans
E tuich miei enoi plazer,
E despendrai mo sen e mo saber
En vos gen servir a jornal
Cum hom serv seignor natural.

Al rei dels Alamans,
Cap dels emperadors,
Vai, chansos, cui valors
Dona, sobre·ls prezans
Tant de pretz cum es grans
Sobre totz sa ricors ;
E del sieu pretz es autors
Lo sieus noms rics benestans,

Qu'el a fre de ric per ver ;
Per refrenar vils faitz e retener
Qu'us non toc a son pretz cabal,
Fre de ric e man port'aital.

Del rei d'Aragon esper
Qu'ades meillur e sapcha mais valer
Qand el aura sen natural,
Puois joves sap tant e tant val.