Ja nus homs pris ne dira sa raison
Adroitement, si con hon dolanz non,
Mes par confort puet il fere chanzon.
Pro a d'amis mes povre son le don.
Honte i avront, se por ma raënçon
Sui çau deus ivers pris.

B ien lo sevent mi home e mi baron,
Englais, Normant, Poitevin e Gascon,
Qe je n'avoie si povre copaignon,
Qe je laissase par avoir en prison.
Je nil di par nulle retraçon,
Mes encor sui je pris.

Or sai je bien de voir certainement
Qe morz ne pris n'a ami ne parent,
Qant hon mi faut por or ne por argent.
Molt m'est de moi, mes plus m'est por ma gent,
Q'aprés ma mort n'avront reprocement,
Car tant ai esté pris.

Ne me merveil seo hai le cor dolent,
Qant mi sires met ma terra en torment.
Se li menbrast de nostre serament,
Qe nos feïmes amdeus comuniment,
Donc sai je bien qe ja plus longement
Non seroie ça pris.

Mi conpagnon, qe je amoie e qe j'ain,
Cil de Chaieu e cil de Percerain,
Chanzon, di lor q'il ne sont pas certain;
Qe je eusse vers els faus cuer ne vain.
S'or mi gerroient trop ferent qi vilain,
Tant con je soie pris.

Bien le sevent Angevin et Torain,
Li bachaler qi sont delivre e sain,
Q'engonbrez sui loing d'eus en autrui main.
Bien m'aïdassent, mes il n'avoient grain.
De belles armes or sunt vit li plain,
Por ce qe je sui pris.

Contese soer, vestre pris soverain
Vos saut et gart celle por cui mi claim
E por cui je sui pris.

Je nel di pas por celle de Chartrain,
La mere Loys.