Tuich me pregon, Engles, qe vos don saut

Raimbaut de Vaqueiras

A vos, bona don'e pros, Ar pren camgat per tostemps de xantar, Ara pot hom conoisser e proar Ara·m digatz, Rambaut, si vos agrada, Ben sai e conosc veramen Conseil don a l'emperador, D'amor no·m lau, qu'anc non pogey tan aut Domna, tant vos ai preiada, D'una dona·m tueill e·m lais, Eissamen ai gerreiat ab amor El so que pus m'agensa Era·m requier sa costum'e son us Eras quan vey verdeyar Et oy Deu, d'amor Fauc per remembransa Forsat m'a encontra devet Gaita be, gaiteta del chastel, Gerras ni plaich no·m son bo Ges, si tot ma don'et amors Ja hom pres ni dezeretatz Ja non cujei vezer Kalenda maia Las frevols venson lo plus fort, Leu pot hom gauch e pretz aver Leus sonetz, No m'agrad'iverns ni pascors No puesc saber per que·m sia destregz Savis e fols, humils et orgoillos, Seigner Coine, jois e pretz et amors Senher n'Aymar, chauzes de tres baros Si ja amors autre pro non tengues Truan, mala guerra Tuich me pregon, Engles, qe vos don saut

Ara·m digatz, Rambaut, si vos agrada,
Si·us es aissi, cum eu auch dire, pres,
Que malamen s'es contra vos guidada
Vostra dompna de sai en Tortones,
Don avetz faich mainta cansson en bada!
Mas ill a faich de vos tal sirventes
Don etz aunitz, et ill es vergoignada,
Que vostr'amors no·il es honors ni bes,
Per q'ella s'es aissi de vos loignada.

Albert marques, vers es q'ieu ai amada
L'enganairitz don m'avetz escomes,
Que s'es de mi e de bon pretz ostada!
Mas no·n puosc mais, qu'e ren no·il ai mespres,
Anz l'ai tostemps servida et onrada!
Mas vos e lieis persegua vostra fes,
C'avetz cent vetz per aver perjurada,
Per qe·is clamon de vos li Genoes,
Que, malgrat lor, lor empeignetz l'estrada.

Per Dieu, Rambaut, d'aisso·us port garentia
Que maintas vetz per talan de donar
Ai aver tout, e non per manentia
Ni per thesaur q'ieu volgues ajostar!
Mas vos ai vist cent vetz per Lombardia
Anar a pe, a lei de croi joglar,
Paubre d'aver e malastruc d'amia,
E feira·us pro qi·us dones a manjar,
E membre vos co·us trobei a Pavia.

Albert marques, enoi e vilania
Sabetz ben dir e mieils la sabetz far,
E tot engan e tota fellonia
E malvastat pot hom en vos trobar,
E pauc de pretz e de cavallaria,
Per qe·us tolgront ses deman Val de Tar!
Peiracorva perdetz vos per foillia!
E Nicolos e Lanfrancos da Mar
Vos podon ben appellar de bausia.

Per Dieu, Rambaut, segon la mi'esmansa,
Fesetz que fols qan laissetz lo mestier
Don aviatz honor e benananssa!
E cel qe·us fetz de joglar cavallier
Vos det enoi, trebaill e malananssa
E pensamen et ir'et encombrier,
E tolc vos joi e pretz et alegranssa,
Que puois montetz de ronssin en destrier
Non fesetz colp d'espaza ni de lanssa.

Albert marques, tota vostr'esperanssa
Es en trazir et en faire panier:
Enves totz cels c'ab vos an acordanssa
E que·us servon de grat e volontier
Vos non tenetz sagramen ni fianssa!
E s'ieu non vail per armas Olivier,
Vos non valetz Rotlan, a ma semblanssa,
Que Plasensa no·us laissa Castaignier:
Tol vos la terr'e no·n prendetz venganssa.

Sol Dieus mi gart, Rambaut, mon Escudier,
En cui ai mes mon cor e m'esperanssa,
A mon dan get de trobar vos e'n Pier,
Vis de castron magagnat, larga panssa

Albert marques, tuich li vostre gerrier
Ant tal paor de vos e tal doptanssa
Qu'il vos clamon lo marques putanier,
Deseretat, desleial, ses fianssa

Source: http://www.cam.org/~malcova/troubadours/