D'amor no·m lau, qu'anc non pogey tan aut
Qu'atertam bas non sia dessendutz!
E s'anc fuy guays entendeire ni drutz
Ma dona·m fai tot refrezir del caut,
Que·m tolh tot gaug e tota ira·m dona
E me meteys e tot quan m'a promes,
E mas cansos me semblo sirventes,
Et ieu que·n pert lo cor e la persona.

Qu'ieu fora pro ricx e de bon azaut,
Sol de s'amor pogues yssir a lutz!
Mas trahitz sui si cum fo Ferragutz,
Qu'a Rotlan dis tot so major espaut,
Per on l'aucis! e la bella fellona
Sap qu'ieu l'ai dig ab qual gienh m'aucizes
Ab un dous ris me nafra·l cor d'un pes,
Ab que m'auci on mielhs m'acuelh ni·m sona.

Sol que·l plagues emblar lo premier saut,
Jamais per lieys no fora cossegutz.
Pero s'ieu fos ben amaz ni volgutz
Ieu chantera ab cor verai e baut,
Mas er tenso quar ma dona·m tensona,
Quar sap qu'ieu am mielhs d'autr'hom'e genses!
E·lh trefana, sol quar es belha res,
Vol qu'om la sierv'e ren non guazardona.

Cortz e guerras e torney et assaut
E domneyar e donar e condutz
Son tug mei pes, e so·yl d'amor tengutz,
A la falsa, si tot noqua m'en laut.
Mas mala fos tam belha ni tam bona,
Qu'ab son ric pretz m'a ses benfag conques!
Et ylh val mai, ab sol que·y fos merces,
Que nulh'autra, e genser si razona.

Si m'a bon cor ara·lh prec e l'incaut
Que·m do sa joy'e·m prometa salutz,
Que·n port anelhs e manjas els escutz,
E·m fassa tant per que de lieys no·m raut!
Si non, vau m'en el pays de Tortona,
E si de sai mi deu venir us bes,
A Dieu coman Proensa e Gapenses,
Qu'ieu remanh pres si cum perditz en tona.