Ara pot hom conoisser e proar
Que de bos faitz rend Dieus bon guizerdon,
C'al pro marques n'a faich esmend'e don,
Q'el fai son pretz sobre·ls meillors pojar
Tant qe.il crozat de Frans'e de Campaigna
L'an quist a Dieu per lo meillor de totz
E per cobrar lo sepulcr'e la crotz
On Jhesus fon, q'el vol en sa compaigna
L'onrat marques, et a·il Dieus dat poder
De bons vassals e de terr'e d'aver
E de ric cor per far miels so que.il taigna.

Tant a d'onor e vol honratz estar
Q'el honra Dieu e pretz e mession
E si mezeis, que s'eron mil baron
Ensems ab lui, de totz si sap honrar,
Q'el honra·ls sieus et honra gen estraigna,
Per q'es desus qan l'autre son desotz!
C'a tal honor a levada la crotz
Que non par ges mais honors li sofraigna,
C'ad honor vol est segl'e l'autr'aver,
E Dieus a·l dat forssa, geing e saber
Co.ls ai'amdos, e tant qant pot s'en laigna.

Cel qui fetz air'e cel e terr'e mar
E freig e caut e ploi'e vent e tron
Vol q'el sieu guit passon mar tuich li bon,
Si cum guidet Melchion e Gaspar
En Bethleem, que·l plan e la montaigna
Nos tolen Turc, e Dieus no·n vol dir motz.
Mas a nos taing, per cui fo mes en crotz,
Que lai passem, e qui que sai remaigna
Vol s'avol vid'e sa greu mort vezer,
Q'en laig pechat estam c'om deu temer,
Don qecs er soutz si.n flum Jordan si baigna.

Dieus si laisset vendre per nos salvar,
E.n soffri mort e·n receup passion,
E l'auniront per nos Juzeu fellon,
E·n fon batutz e liatz al pilar,
E·n fon levatz el trau q'er'en la faigna
E correjatz de correjas ab noz
E coronatz d'espinas en la crotz:
Per q'a dur cor totz hom qe·l dan non plagna
Qe·ns fant li Turc que volont retener
La terr'on Dieus volc mortz e vius jazer,
Don nos n'eschai grans gerr'e grans mesclaigna.

Mas tant nos fai nostre pechatz torbar
Que mort vivem e non sai dire com,
C'un non i a tant gaillart ni tant pro,
Si a un gauch non ai'autre pesar,
Ni es honors q'ad anta no s'afraigna,
Car contr'un gauch a·l plus rics mil corrotz.
Mas Dieus es gaugz per c'om si seign'en crotz,
Per que non pot perdre qui lui gazaigna!
Per q'ieu am mais, s'a lui ven a plazer,
De lai morir que sai vius remaner
En aventura, fos mi'Alamaigna.

Nostr'estol guit sains Nicholaus de Bar,
E·il Campanes dreisson lor gonfanon,
E·l marques crit Monferrat e·l leon,
E·l coms flamencs Flandres als grans colps dar,
E fieira·i qecs d'espaz'e lansa·i fraigna,
Que leu aurem los Turcs totz mortz e rotz
E cobrarem en camp la vera crotz
C'avem perdut! e·il valen rei d'Espaigna
Fassant grans ostz sobre·ls Maurs conquerer,
Que·l marques vai ost e setge tener
Sobre·l soudan e pass'en breu Romaigna.

Nostre Senher nos mand'e·ns ditz a totz
Qu'anem cobrar lo sepulcr'e la crotz!
E qui volra esser de sa companha
Mueira per lui, si vol vius remaner
Em paradis, e fassa som poder
De passar mar e d'aucir la gen canha.

Bels Cavalliers, per cui fatz sos e motz,
Non sai si·m lais per vos o·m leu la crotz,
Ni sai cum an ni sai comen remigna,
Que tant mi fai vostre bels cors plazer
Q'ieu muor s'ie·us vei e, qand no·us puosc vezer,
Cuich morir sols ab tot'autra compaigna.