Tuich me pregon, Engles, qe vos don saut

Raimbaut de Vaqueiras

A vos, bona don'e pros, Ar pren camgat per tostemps de xantar, Ara pot hom conoisser e proar Ara·m digatz, Rambaut, si vos agrada, Ben sai e conosc veramen Conseil don a l'emperador, D'amor no·m lau, qu'anc non pogey tan aut Domna, tant vos ai preiada, D'una dona·m tueill e·m lais, Eissamen ai gerreiat ab amor El so que pus m'agensa Era·m requier sa costum'e son us Eras quan vey verdeyar Et oy Deu, d'amor Fauc per remembransa Forsat m'a encontra devet Gaita be, gaiteta del chastel, Gerras ni plaich no·m son bo Ges, si tot ma don'et amors Ja hom pres ni dezeretatz Ja non cujei vezer Kalenda maia Las frevols venson lo plus fort, Leu pot hom gauch e pretz aver Leus sonetz, No m'agrad'iverns ni pascors No puesc saber per que·m sia destregz Savis e fols, humils et orgoillos, Seigner Coine, jois e pretz et amors Senher n'Aymar, chauzes de tres baros Si ja amors autre pro non tengues Truan, mala guerra Tuich me pregon, Engles, qe vos don saut

Senher n'Aymar, chauzes de tres baros
Cal prezas mais, e respondes premiers,
Et aprop vos responda·n Perdigos:
Qe l'uns es larcs e gais e ufaniers,
E·l segonz es adretz e bons terriers
Et alques larcs, mas non d'aital semblanza,
E·l ters es bos per conduich e per lanza
E gen garnens! cals a meillors mestiers

En Rainbaut, aisel dic qu'es plus pros
C'ab mezura fai toz sos fatz entiers,
E n'es sos pretz longamen cabalos,
E·n pot esser als enemics sobriers!
S'el es adretz, cortes ni placentiers,
Doncs val el mais, segon la mi'ismanza,
Qu'elz autres dos a tan de pejuranza,
Per que negus non l'es de pretz pariers.

Baros, eu sai que·us venserai amdos,
Car mantenc lai don soi plus galaubiers,
Ab ufana, q'es cabs, ab messios,
De proeza e prez plus vertadiers!
E monseihner aia terr'e deniers,
Pos proeza no·l plaz ni non l'enanza!
E·n Rainbauz mainteihna sels de Franza,
C'armas e vis es toz lor conseriers.

Perdiguon, trop a granz meillurazos
Sel que ten jen los sieus e·ls estrangiers,
Et es temsutz mais ab cen compaihnos
Que s'us autres n'avia dos milliers!
Et ufana non es mas cors leugiers
E fols pretz vans, c'ab non-poder balanza,
E rics escars non pod aver honranza
Ab menutz dos per plazers mesongiers.

En Rainbaut, rics hom braus orgoillos
Es lo vostre, car es bons cavalliers,
Per que non val tan la vostra razos,
Que pauc ni pro non met mas en sabriers!
E·n Perdigos pren con joglars laniers,
Qu'en penr'aver a tota s'esperanza!
E·l mieus es gais e de bella semblanza,
Si tot non vol pretz d'orbs ni d'escassiers.

A monseihnor vei qu'enoja·l tensos,
C'ades manten los sieus fatz menudiers,
E vol proez'e bon pretz metre jos,
Sol car no·n sab ni no·n es cosdumiers!
E·n Rainbautz mante los cors pleniers,
Qu'en pron manjar a toa sa fianza,
Mas si·l marches li fos d'aital semblanza,
Enqer fora joglars o escudiers.

Senher n'Aymar, vos etz vencutz primiers!
E·n Perdigos viule descortz o dansa,
Que contrafa n'Estornel ab sa lansa,
E no fora de luy aitals mestiers.

.......................................
.......................................
.......................................
.......................................

A monsenher tanh aissi pretz entiers
Cum a mi fay lo regisme de Fransa!
E·n Raymbautz, quant ab armas s'eslansa,
Sembla trop mielhs jocglars que cavalliers.

Source: http://www.cam.org/~malcova/troubadours/