Ges, si tot ma don'et amors
M'an bauzat e mes a lor dan,
No.us cugetz qu'ieu n'oblit mon chan
Ni qu'en vailla meins ma valors
Ni que ja·n lais nuill autr'onrat mestier
Ni nuill bon fait que·s tanh'a cavalier,
Ni que·m tueilla bona vid'avols mortz,
Si coma fes quan passei lai los portz.

Galop e trot e saut e cors,
Veillars e maltrait et afan
Seraun mei sejorn darenan,
E sufrirai freitz e calors,
Armatz de fer e de fust e d'asier,
E mei ostal seraun bosc e semdier
E mas chansos sirventes ab descortz,
E mantenrai los frevols contra·ls fortz.

Mas per o quar mi for'honors,
S'ieu trobes dona benestan,
Avinen e cueind'e prezan,
A cui no plagues ma dolors,
Que no·s vires ni crezes lauzengier
Ni no·s fezes trop preiar, s'ieu l'enquier,
De leis amar fora leus mos acortz,
S'ill ames me, c'aitals es mos conortz.

Mas qu'ar sobra mon sen folors,
Qu'estat n'aurai perdutz un an
Per una fals'ab cor truan!
Mas jois m'a tan dousas sabors
Que·m pot dar gaug e tolre consirier
Mal grat d'amor e de mon cor leugier
E de midons, c'a totz tres soi estortz,
E ponharai com senes els m'esfortz

De servir e d'autras lauzors,
E de totz bons faitz trair'enan,
De pretz e de lans'e de bran,
Entre·ls reis e·ls emperadors!
Vas Monferrat e sai vas Foncalquier
Viurai de guerr'a lei de mainadier!
E pos d'amor no·m ve autre cofortz,
Partirai m'en, et er sieus totz lo tortz!

Car ai proat d'amor tot son mestier:
C'aisill que son camjador e leugier
Son meils amat, e qui la serf es mortz,
Per qu'ieu soi ricx, quar ieu li soi estortz.

Na Biatriz, vostre ric prez sobrier
Salf Deos e gart, aisi com voill e qier,
E qi no·l vol sia desfaiz e morz,
Q'a lui no plaz joi, solaz ni deporz.