Tuich me pregon, Engles, qe vos don saut

Raimbaut de Vaqueiras

A vos, bona don'e pros, Ar pren camgat per tostemps de xantar, Ara pot hom conoisser e proar Ara·m digatz, Rambaut, si vos agrada, Ben sai e conosc veramen Conseil don a l'emperador, D'amor no·m lau, qu'anc non pogey tan aut Domna, tant vos ai preiada, D'una dona·m tueill e·m lais, Eissamen ai gerreiat ab amor El so que pus m'agensa Era·m requier sa costum'e son us Eras quan vey verdeyar Et oy Deu, d'amor Fauc per remembransa Forsat m'a encontra devet Gaita be, gaiteta del chastel, Gerras ni plaich no·m son bo Ges, si tot ma don'et amors Ja hom pres ni dezeretatz Ja non cujei vezer Kalenda maia Las frevols venson lo plus fort, Leu pot hom gauch e pretz aver Leus sonetz, No m'agrad'iverns ni pascors No puesc saber per que·m sia destregz Savis e fols, humils et orgoillos, Seigner Coine, jois e pretz et amors Senher n'Aymar, chauzes de tres baros Si ja amors autre pro non tengues Truan, mala guerra Tuich me pregon, Engles, qe vos don saut

Leu pot hom gauch e pretz aver
Ses amor, qui be·i sap poignar,
Ab qe·is gart de tot malestar
E fassa de ben son poder!
Per q'ieu, si tot amors mi faill,
Fatz tant de ben cum puosc e vaill,
E s'ieu pert ma dompn'et amor
Non vuoill perdre pretz ni valor.
Q'estiers puosc viure onratz e pros,
Per que no·m cal far d'un dan dos.

Pero ben sai, si·m desesper,
Qe·l mieills de pretz i desampar,
C'amors fa.ls mellors meillurar
E·ls plus malvatz pot far valer,
E sap far de volpill vassal
E·l desavinen de bon taill,
E don'a mains paubres ricor!
E pois tant i trob de lauzor
Eu sui tant de pretz enveios
Que ben amera s'amatz fos.

Mas per o m'en vuoill estener,
C'amors tol mais que non vol dar,
Que per un be·il vei cent mals far
E mil pesars contr'un plazer,
Et anc non det joi ses trebaill.
Mas, cum qe·is vuoilla, so engaill,
Q'ieu non vuoill son ris ni son plor!
Puois non aurai gauch ni dolor,
Sivals no·il serai mals ni bos,
E lais m'estar desamoros.

Pois totz bos aips vuoill retener,
Ja non remaigna per amar,
Puois no·m poira jois repropchar
Ni pretz qe·ls met'e noncaler,
Ni q'en ren vas lor m'anuaill!
C'us amoros desirs m'assaill
Per tal q'el mon non a genssor,
E prend en luoc de ben l'onor,
Car vol qu'eu lau en mas chanssos
Son pretz e sas bellas faissos.

Ja sa beutat ni son saber,
Son bel ris ni son gen parlar
No·m cuich ma dompna vendre car,
Que be·m puosc de s'amor tener.
Mas qan si ve dinz son miraill
Color de robin ab cristal,
E car la lauzon li meillor,
Mi cuj'aver per servidor,
Cais c'onors m'er si no m'es pros!
Mas non cuich q'ieu l'am em perdos.

Ab cor faich vau midonz vezer,
C'ara·m pot perdre o gazaignar!
E si vol mos precs escoutar
Aura·m sempres a son voler,
E si.n autra razon m'assail
No·is taing qe·m tenson ni·m baraill
Ab lieis, mas pens d'autr'amador,
Et anc Floris de Blanchaflor
Non pres comjat tant doloiros
Cum eu, dompna, si·m part de vos.

Johan ses terra, si d'amor
Non ai en breu gauch et honor,
Jamais non serai amoros
E viurai mal grat d'amor pros.

Pero si ma dompna·m socor,
Q'es caps de pretz e de valor,
Ben poirem estar eu e vos
Honrat entre.ls drutz cabalos.

Source: http://www.cam.org/~malcova/troubadours/