No puesc saber per que·m sia destregz
Ni sai on es amors qu'om tan mentau,
Qu'ieu non l'auzi ni non la vey ni l'au,
Mas per semblans mais hi truep tortz que dretz.
Mas als clamans l'aug clamar amor fina:
Ve·us lo conort que m'enuej'e·m destruy
E·m fai amar lieys que·m ten pres e·m fui
Et en fugens m'encaussa e·m camina.

Partir no·m puesc ni no sai estar quetz,
Qu'ira·m fai dir gaban mon talan brau!
Tan suy destretz qu'ie·m rancur quar non gau
Lieys qu'ieu am mais que non amet vasletz
Guis de Nantuelh la piussel'Ayglentina,
E muer aman! tan outracujatz sui
Quar non podem dire·l marit abduy,
E·n torn'a ma et auci sa vezina.

E doncx que·m val lauzenjars ni abetz
Per l'oc reman e per lo non m'esmau!
Et er m'a far lo conort del bertau,
Cum selh que ditz en chantan en Folquetz,
Qu'a Tortona, lai part Aleixandrina,
Queyra merce, mas say no truep refuy!
Et er me grieu si·m part de lieys per bruy:
Sol o comens, qu'er dans si no s'afina.

Bona dona, fis e francx et adretz
Vos ai estat e portat vostre lau!
Parlem abduy planamens e suau,
Et entendetz que·us diray esta vetz:
Amada·us ai mays qu'Andrieus la reyna!
Premeiramens que fos mieus ni d'autruy
Suy ieu vostres, e serai ses tot cuy.
Doncx non es vos ma sor ni ma cozina

Lo jorn que·ns ac amors abdos eletz,
Vostra beutat me det l'erguelh del pau,
Que remira·l vert e·l vermelh e·l blau
Tro per erguelh s'erra de las paretz!
Aquelh erguelh li te tro que·l cap clina,
Que ve sos pes! et ieu contrafas luy,
Quan vey midons qu'ab belh semblan m'aduy
Gaug et erguelh, tro qu'ap no m'atayna.

En Proensa, quant encaus ni quan fuy,
Crit Monferrat, la senha de qu'ieu suy,
E Tortona, lai part Aleyssandrina.