Si ja amors autre pro non tengues
Mas car om n'es plus gais e plus cortes
E miels parlanz e de meillor solatz
E·n conois miels los pros entre.ls malvatz
Et enten miels q'es mensonja ni ver
E tri'enanz q'es enueg ni plazer,
Pos amors sap tan ric guizardon rendre
Neguna res no·s deu d'amor defendre.

Donc, ma domna, vostre franc cors, so.m pes,
Mas amors es flors e frugz de totz bes,
Se·us conseilha paratges ni beutatz
Qe non ametz, mal s'es acosseillatz:
Con mais vos fa Dieus e valors valer
Vos devetz mais d'humilitat aver.
Mas tant m'es aut c'ap re no·i puesc atendre,
Ni·l vostre pretz non vol tan bas descendre.

E car eu am la plus avinen res
C'anc dels oils vis, degra trobar merces,
Oc, se·l plagues, car lai on es juvatz
De totz bos aibs, aten c'umilitatz
Li entr'el cor tan qe·m do ses qerer
Lo joi q'eu ja per qerrer non esper,
Qe.m vueilh totz temps, car aus en leis entendre,
De malvestat escondir e defendre.

Tant m'a amors e jois lassat e pres
El sieu fin cor gai e cortes,
On es plazers e jovenz e beutatz,
E·l sieus cars pretz q'es flors dels plus prezatz,
Qe·l gaugz q'eu n'ai non pot en mi caber.
Gardatz si.m fezes amors null plazer
Si·m dera gaug, q'era per sol l'entendre
N'ai tals mil gaugz qe rics seria.l mendre.

A vos, per cui pretz viu e nais et es
Et a cobrat som briu en totas res,
Bella donna, contessa de Burlatz,
Ren ma chanzon, car ades meilluratz!
Q'ont qe vivatz ja non pot dechazer
Pretz ni jovenz ni solatz ni plazer,
C'aissi co·l venz fa lueng la flam'escendre
Vei vostre pretz sobre·ls meillors estendre.

A Mon Segur, chanzon, te fai saber,
E digas li, e semblara plazer,
C'om miels de leis no sap dir ni entendre
Ni miels chantar, mas trop poignh'ad apendre.

Plus Avinen, si be·us vau tart vezer,
Mais res mas vos e mi non a poder,
Ni fas chanzo per donar ni per vendre,
Mas sol per vos, si la degnatz apendre.

Los lauzengiers, bels amics, vei empendre,
Qe·us sonon gent e·us blasmo de seguendre.