Ben sai e conosc veramen
Que vers es so que·l vilas di,
Que nuils hom, qu'es dins son aizi,
Trobe tot so que vai queren,
E s'anc non ac malanansa
No sap que s'es benestansa!
Mas adoncx l'es totz sos deleitz doblatz
Quan sap l'aize salvatge,
E n'ama mais tot so dins son estatge.

Mas d'ome·m meravill fortmen,
Que sap mals e bes autressi
E sap com va·l cars al moli,
E pot viure onradamen,
Com pot far tan gran enfansa
Que suefra tal malestansa
Que an per mar! mas als dezamparatz,
Que non an peins ni gatge,
Lais tot aquo, e fas autre viatge.

Que·ill mermes.... son cozen
El anar: d'autrui o de si
A gran regart ser e mati
Em poder d'aigua e de ven,
....................
Et es tot jorn en balansa,
Et a·i vestirs rovillos e moillatz,
E gens d'avol linhatge
Dir l'aun enueg e faraun li outratge.

E qui mal tra e peitz aten
Ja de be no·ill fassa hom fi,
Ans ha regart per tot aqui
On vai, ni perte ribamen,
E ja no·ill tengron fiansa
Ni sagramen ni fermansa,
Ans, si podon, li sera·l sieus panatz!
Ges ieu no tenc per sage
Ric c'o persec, ans fai doble folatge.

Qu'ieu pretz mais jazer nutz e gen
Que vestitz josta peleri,
E mais aigua fresca ab bon vi
....................
......que ransa,
E mais joia que pezansa,
E bos manjars e palafres assatz
Que bescueitz ab auratge,
E bels ostals mais que port ni ribatge.

Per qu'ieu m'en part, s'anc n'aic talen
De l'anar ni anc abeli,
E qui·s vol, segua aquest trai
E garde levan e ponen!
Qu'ieu am mais estar en Fransa,
On ha mais joi et onransa,
Et ab totz vens ieu penrai vas totz latz
En luec ferm alberguatge,
E cui plaira, segua aquest viatge.