Ja hom pres ni dezeretatz
Non er de bos amicx garnitz,
E·l manens qu'es d'aver issitz
Es vil tengutz e pauc amatz,
E tostems hom desbaratatz
Ditz hom c'a perdut per nosen,
E ten hom greu per fol manen
Ni home quan fort l'es ben pres!
E fora savis e cortes
Qui des tan bon conseill denan
Com fai quant hom ha pres lo dan.

Ben pot hom en autruis foudatz
Apenre com er plus complitz,
Plus onratz e plus obezitz,
E plus francx e plus ensenhatz!
E non pot esser fort senatz
Qui no·s dona garda soven
Com l'uns pueja, l'autre deisen,
E qui no conquer, quan luecx es,
Amicx! e quan los ha conques,
Gart los, quar mais hi a d'afan
Qu'el conquerer, al mieu semblan.

Vilas es et outracuidatz
Totz hom, quan si sent enrequitz,
Que·s cuida c'ab sos vilas digz,
Ab sobrieiras ni ab foudatz
Li deia hom esser privatz,
Ni c'om ja l'am de bon talen!
E si tot hom lo·i fai parven
Per paor, aquo non es res,
Que quan lo trob'om en deises,
Ab gaug et ab alegrer gran
Rizon tug, quant el vai ploran.

Eu dic que ben es estragatz
Hom rics erguillos descauzitz,
Que vol ades tener aunitz
Sos vezis ni apoderatz!
E deu ben esser aziratz
E mal volgutz per tota gen,
Et es razo si mal l'en pren,
Que nos avem vist et apres,
Per un ho per dos ho per tres,
Que si son anat percassan,
Don tug devem esser membran.

C'aissi n'es lo setgle passatz
Que l'uns es pex, l'autr'eisernitz,
L'us vilas, l'autre gen noiritz,
L'un mal apres, l'autr'ensenhatz,
E de totz mals estars cargatz,
L'un vertader, e l'autre men!
Qu'el mon non a un tan valen
En cui tug bon aip sion mes,
For lo rei dels Aragones,
Quar en lui son tug ben sobran,
Ja non sabres demandar tan.