Las frevols venson lo plus fort,
Que fortz frevol non pot durar!
Quar frevol vey fort frevolar,
Aissi bat frevols contrafort,
E·n frevol trop tan de vigor
Quez a fort tol sa gran valor.
Fortz a frevol non a poder.

Us niens es qu'adutz a mort
So qu'el fai e qu'el pot desfar,
Que es so que lo mons ten car!
Doncx al mon fai niens gran tort.
E·l mons, cum suefre tal folhor
Quar niens a tan gran sabor
Que·l mons l'acuel el cartener.

Vist ai e trobat en ma sort
Que d'agre potz doussor gitar
Ab breu aten ses ajustar!
Doncs agr'e dous eysson d'un port.
E fai tant agres ab doussor
Que l'ivern mescla ab calor!
Mas l'agres fuy al dous parer.

Soven mi do gaug e conort,
Que vey lo mort ressuscitar.
Mais pot mortz que vius acabar,
Per qu'ieu ab lo mort be m'acort.
Et el mort a trop gran ricor,
Per que mortz non deu far paor,
Que·l mortz no notz e pot valer.

En la canal que ditz conort,
Vey caut e freyt entremesclar!
Ab l'un pot l'autre amortar,
E son abduy d'engual comport.
Ricx ers tan cum gitaras por,
E pupres si te dic color
Non ieu, ans mescle sen ab ver.

Per frevols son vencut li fort,
E potz d'agre doussor gitar,
E caut e freyt entremesclar,
E niens met son don a mort,
Et el mort a trop gran ricor,
E ric perdon si per honor
Que fan, e deu lur escazer.