D'una dona·m tueill e·m lais,
Qu'ieu no vueill sa paria
Pos vei que va de biais
Ni que ten autra via!
Qu'eu l'era fis e verais
E ses tota bauzia,
Que per ma fe
E'l'amava mais que re!
Fassa son be,
C'a far l'er, si·s pliu per me.

Ges non pres un botacais
Dona que aitals sia
C'un prenda et autre·n lais:
Non fai ges cortezia.
Soven presta son carcais,
Nuils hom non s'i fadia,
Segon qu'ieu cre!
Quar molt es de gran merce,
Qu'ieu ho sai be
E d'autres moltz, per ma fe.

Ges una pruna d'avais
En s'amor non daria,
Si be·m fai ni col ni cais!
Per que·us ho celaria
Quan la vei, m'o tenh a fais,
S'alre far en podia.
Sabes per que
.......................................
Dieus que·m mante
L'en do so que l'en cove.

Ben es tornad'en debais
La beutat qu'ill avia,
E no l'en te pro borrais
Ni tefinhos que sia,
Et es ben razos hueimais,
Que·l jovens te sa via!
E par li be
A son escueill, qui la ve:
Mal si capte
E fara peitz per jase.