No m'agrad'iverns ni pascors
Ni clars temps ni fuoills de garrics,
Car mos enans mi par destrics
E totz mos majer gaugz dolors,
E son maltrag tuit miei lezer
E desesperat miei esper!
E si·m sol amors e dompneis
Tener gai plus que l'aiga·l peis
E pois d'amor me sui partitz
Cum hom issillatz e faiditz,
Tot'autra vida·m sembla mortz
E totz autre jois desconortz.

Pois d'amor m'es faillida·il flors
E·l dolz fruitz e·l grans e l'espics,
Don gauzi'ab plazens prezics
E pretz m'en sobrav'et honors
E·n sabi'entre·ls pros caber,
Era·m fai d'aut en bas cazer!
E si no·m sembles fols esfreis,
Anc flama plus tost non s'esteis
Q'ieu for'esteins e relinquitz
E perdutz en faitz et en digz
Lo jorn qe.m venc lo desconortz
Que non merma, cum qe·m refortz.

Bels armatz e bos feridors,
Setges e calabres e pics,
E traucar murs nous et antics,
E vensser bataillas e tors
Vei et aug! e non puosc aver
Ren qe·m puosc'ad amor valer
E vauc cercan ab rics arneis
Gerras e coitas e torneis,
Don sui conqueren enriquitz!
E pois jois d'amor m'es failitz,
Totz lo mons no·m parri'us ortz,
Ni mos chans no m'es mais confortz.

Doncs, qe·m val conquistz ni ricors
Qu'eu ja·m tenia per plus rics
Qand er'amatz e fis amics,
E.m paissi'ab n'Engles amors!
N'amava mais un sol plazer
Que sai gran terr'e gran aver,
C'ades on plus mos poders creis
Ai major ir'ab mi mezeis,
Pois mos Bels Cavalliers grazitz
E jois m'es loignatz e fugitz,
Don mais no·m naissera conortz,
Per q'es majer l'ir'e plus fortz.

Pero no·m comanda valors,
Si be·m sui iratz ni enics,
Q'ieu don gaug a mos enemics
Tan q'en perda pretz ni lauzors,
Q'ancar puosc dan e pro tener,
E sai d'irat joios parer
Sai entre·ls Latins e·ls Grezeis!
E·l marques, que l'espaza·m seis,
Gerreia Blacs e Drogoiz,
Et anc pois lo mons fon bastitz
Nuilla gens non fetz tant d'esfortz
Cum nos, cui Dieus a gent estortz.

Lo marques n'es honratz e sors
E·l Campanes e·l coms Enricx,
Sicar, Montos e Salanicx
E Costantinople socors,
Quar gent sabon camp retener,
E pot hom ben proar en ver:
Qu'anc mais nulha gent non ateis
Aitan gran honor, apareys.
Per bos vassals, valens, arditz,
Es nostr'emperis conqueritz,
E Dieus trameta nos esfortz
Coissi·s tray'a cap nostra sortz

Anc Alixandres non fetz cors
Ni Carles ni·l reis Lodoics
Tan honrat, ni·l pros n'Aimerics
Ni Rotlans ab sos poignadors
Non saubron tan gen conquerer
Tan ric emperi per poder
Cum nos, don poja nostra leis!
Q'emperadors e ducs e reis
Avem faitz, e chastels garnitz
Prop dels Turcs e dels Arabitz,
Et ubertz los camins e·ls portz
De Brandiz tro al Bratz Sain Jorz.

Per nos er Domas envazitz
E Jerusalem conqueritz
E·l regnes de Suri'estortz,
Que·ls Turcx o trobon en lur sortz.

Los pellegris perjurs, fraiditz,
Qi nos an sai en camp geqitz,
Qi los manten e cortz es tortz,
Que chascuns val mens vius que mortz.

Belhs dous Engles, francx et arditz,
Cortes, essenhatz, essernitz,
Vos etz de totz mos gaugz conortz,
E quar viu ses vos, fatz esfortz.