Truan, mala guerra
Sai volon comensar
Domnas d'esta terra
E vilas contrafar:
En plan o en serra
Volon ciutat levar
Ab tors,
Quar tan pueia l'onors
De leis que sotzterra
Lur pretz e·l sieu ten car,
Qu'es flors
De totas las melhors,
Na Biatritz! car tan lur es sobreira
Qu'encontra lieis faran totas senheira
E guerr'e fuec e fum e polvereira.

La ciutatz s'ajosta
E fan murs e fossatz!
Domnas, ses somosta,
I venon de totz latz,
Si que pretz lur costa
E jovens e beutatz.
E pes
Que·l filha del marques
N'aura manta josta,
Car a conques en patz
Totz bes
E totz bos aibs cortes!
E car es pros e franch'e de bon aire
Non estara plus en patz que sos paire,
Que tornatz es a lansar et a traire.

Domnas de Versilha
Volon venir en l'ost,
Sebeli e Guilha
E na Riqueta tost,
La mair'e la filha
D'Amsiza, can que cost!
Ades
Ven de Lenta n'Agnes
E de Ventamilha
Na Guilhelm'a rescost.
Empres
Er la ciutatz en pes.
De Canaves i ven molt gran companha,
De Toscana, e domnas de Romanha,
Na Tomazin'e·l domna de Soranha.

Engles e Garsenda
E Palmeir'e n'Auditz,
N'Aud'e na Berlenda,
N'Agnes e n'Eloitz,
Volon que lur renda
Joven na Biatritz!
Si no,
Las domnas de Ponso
En querran esmenda.
E lai part Mon Senitz
Somo
La ciutatz Contesso,
Qu'ades guerrei leis qu'es tan bon'e bella,
Que sos gens cors tol a la Damizella
E a totas color fresqu'e novella.

Maria la Sarda
E·l domna de sant Jortz,
Berta e·l Bastarda
Mandon tot lur esfortz,
Que joves Lombarda
Non rest de sai los portz.
E sai
Qu'a na Biatritz plai,
Quar lurs reiregarda
Non pot esser tan fortz
Qu'esglai
Lo sieu fin pretz verai.
Donan lur senh, cavalcon ab gran joia!
Fag an ciutat et an li mes nom Troia:
Poestat fan de midons de Savoia.

La ciutatz se vana
De far ost en arrenc,
E sona·l campana,
E lo vielhs comuns venc,
E ditz per ufana
Que chascuna desrenc!
Pueis ditz
Que·l bela Biatritz
Estai sobeirana
De so que·l comuns tenc:
Aunitz
N'es totz e desconfitz.
Trompas sonon e la poestatz cria:
Demandem li beutat e cortezia,
Pretz e joven, e totas cridon: sia

La ciutatz se vueia
E movon lur carros,
E·l vielhs comuns pueia
E gieton en lur dos
Coirassas de trueia
Ab que cobron lurs os!
Gambais
An et arcs e carcais,
E non temon plueia,
Ni mals temps no lur nos.
Ueimais
Veirem de grans assais.
De totas partz comenson a combatre!
Na Biatritz cuidan de pretz abatre,
Mas non lur val, s'eran per una quatre.

Per los murs a fendre
Fan engenhs e castels,
E calabres tendre,
Gossas e manganels,
Fuec grezesc acendre,
E fan volar cairels!
De jos
Traucan murs ab bossos.
Per tal no·s vol rendre
Lo sieus joves cors bels,
Joios,
Faz de bellas faissos.
Totas cridan: ajuda, tra l'esponda
L'un'a l'altra! la tersa ten la fronda,
E trazon tug li genh a la reonda.

Na Biatritz monta
E va·s de pretz garnir:
Ausberc ni porponta
Non vol, e vai ferir
Sel'ab cui s'afronta,
Que pres es de morir!
E jonh
Et abat pres e lonh.
Fait a tanta jonta
Que l'ost fai desconfir!
Pueis ponh
Tant que.l carros desjonh.
Tanta n'a prez'e derrocad'e morta
Que·l vielhs comuns s'esmai'e·s desconorta,
Si qu'a Troia l'enclaus dedinz la porta.

Na Biatritz, be.m plai quar es estorta
A las vielhas, que·l vostres gens cors porta
Pretz e joven, c'a lor proeza morta.
Bels Cavaliers, vostr'amors mi conorta
E·m dona joi e m'alegr'e·m deporta,
Quant autra gens s'esmai'e·s desconorta.