Ja non cujei vezer
C'amors mi destreises
Tant que dompna·m tengues
Del tot en son poder,
Que contra lor orguoill
For'orgoillos, cum suoill,
Mas beutatz e jovens
E gentils cors plazens
E·il gai dich plazentier
De mon Bel Cavallier
M'ant faich privat d'estraing!
E puois durs cors s'afraing
Vas amor en luoc car,
Sap mieills sa dompn'amar
C'umils trop amoros,
De totas enveios.

Ma dompna.m pot aver
E nuill'autra non ges,
Per o qe·il gensser es
E car sap mais valer,
C'aitals es cum la vuoill,
Que ren no·i met ni·n tuoill:
Coind'e gai'e plazens,
Bella et avinens,
Et a bon pretz entier,
E sen qan l'a mestier
E foudat lai o·is taing,
E nuils bes no·il sofraing,
C'ab faitz et ab honrar
Si fai a totz prezar
E lauzar als plus pros
Qe·i vezon mais razos.

E si·m vol retener
Aissi cum m'a promes,
Mout m'es ben d'amor pres,
Mas trop fatz lonc esper,
Que del dezir mi duoill
Qe.m mostron siei beill huoill
E sa cara rizens!
E si·m des sos cors gens
So c'ab son conseill qier,
Vencut agr'a sobrier
D'aventura Galvaing,
Q'en sa merce remaing
Pois mi volc autreiar
Qe'eu la pogues preiar
Et amar en rescos
E.n fezes mas chanssos.

Dieus la.m lais conquerer
E vailla·m dreitz e fes,
Q'ieu sui del tot conques,
C'a lieis no·m puosc tener!
E pois vassals acuoill
Seignor en son capduoill,
Qe·il es obediens,
Pauc d'esfortz fai si·l vens.
Doncs midonz si·m conquier
C'ab fin cor vertadier
Li sui, e s'ela·m fraing
Mos covens, nuill gazaing
Non pot el mieu dan far,
E fara s'en blazmar
S'ieu la serv en perdos
E puois l'es mos dans bos.

Dompn', aisso·m fai temer
Qe·m failla·l gaugz enpres,
Car me sui tant aut mes
Per q'ieu tem bas cazer!
Mas no·m viest ni·m despuoill
Ab negun mal escuoil,
Que celans e temens
Et homils e sofrens
Vos sui, ses cor leugier!
E ditz el reprovier
C'onratz bes mal refraing,
Per c'a vos m'acompaing,
Qe·il mal seignor avar
Fant lor vassals baissar,
E·l larcs enanss'ab dos
Si e sos compaignos.

De solatz e d'aver
Es larg', e no·i fail res,
Pros dompna, mas merces,
E merce·us vuoill qerer,
C'aprop la flor e·l fuoill
Nais d'albre fruitz c'om cuoill,
E merces nais breumens
Apres valor e sens,
Qui franchamen l'enquier!
Et hom ja fai mainier
D'un esparvier guilfaing,
Et eu qe·us mi complaing
Non puosc merce trobar,
E Dieus cum poc formar
Tantas bellas faissos
Lai on merces non fos

Mala·m poc tant plazer
Vostre gens cors cortes,
Q'ieu pert d'autras mains bes,
C'aissi·m deu escazer,
Car per vos mi destuoill,
Com a·n Gui d'Esiduoill,
A cui fo sovinens
La rein'entendens,
Don la fad'el vergier
Perdet! et eu sofier
E veill e plor e plaing
Per vos, e pens e.m laing
Cum pogues conquistar,
E degra·us gazaignar,
Q'ie.n pert d'autras per vos
Que m'agran faich joios.

Bona dompna valens,
Cortes'e conoissens,
Non crezatz lausengier
Ni jelos malparlier
De mi, c'ab vos remaing!
C'ad autra no·m complaing,
Ni puosc mais dompn'amar,
Mas servir et honrar
Las vuoill totas per vos,
Q'etz plus bell'e plus pros.

Na Biatritz valens,
Etz bella e plazens,
E.us donon pretz entier
Dompnas e cavallier
E qui qe·us acompaing.
A totz si cum lor taing
Sabetz ben dir e far
E.ls meillors mais honrar,
E s'ieu dic ben de vos,
Assatz n'ai compaignos.