Gerras ni plaich no·m son bo
Contr'amor e nuill endreig,
E cel fabrega fer freig
Q'en vol ses dan far son pro,
C'aissi·m vol amors aucire
Cum auci·ls sieus seigner mals,
Qan sa gerra m'es mortals
E sa patz pieitz de martire!
E s'anc jorn fom enemic,
Anc Tibauz ab Lodoyc
No fetz plait ab tans plazers
Cum eu, qan sos tortz m'esders.

Car per esmend'e per do
M'a sobre·ls amans eleig
Ma dompn', on son tuit bon deig
Pausat en bella faisso,
Don muor d'ir'e de conssire,
Car no·m n'estai comunals
Amors! c'ab sospirs corals
M'auci·l bels semblans trazire
De lieis cui am ses cor tric,
C'ab joven gerrei'antic,
Qu'il val sobre totz valers,
So·m mostr'auzirs e vezers.

Qan pens cals es ni qui so,
Be·m sui mes en ord'estreig,
E s'ieu qier mais que non deig,
Sa gran beutat n'ochaiso
Qe·m forss'e·m fai l'orguoill dire,
E sa colors naturals,
C'ades genss'e no·i mescl'als
Mas gais solatz ab doutz rire!
E pos tant amar si·m gic,
Pauc l'enanso·il miei destric,
E si·l sieus bels digz es vers,
Tot don val mos bos espers.

Si m'estassetz a razo,
Bella dompna, ni a dreig,
Ja no·m tengratz tant destreig
En vostr'onrada preiso,
Don non ai poder qe.m vire,
Anz sui tant fis e leials
Vas vos que vas mi·n sui fals,
E.us am tant que mi n'azire!
E s'ieu no·n fauc tant ni·n dic
Cum s'ataing al vost'amic,
Als faitz m'en sofraing poders
Et al vostre laus sabers.

En luoc de faitz d'aut baro
Vos am e.us prec e·us dompneig,
E·l vostre bel cors adreig
Laus e gard a cui ni co,
E qan puosc ben far, no·i tire,
Q'esser deu vostr'amics tals
Que si'entre·ls pros cabals!
E car sofretz q'ie·us desire,
Cuig esser pars del plus ric,
E qan d'autras mi fadic,
No m'o fai far nocalers,
Mas vostr'onratz capteners.

E non es ni er ni fo
Gensser de neguna leig
Ni mieiller, per q'ieu enpleig
Lo mieu oc el vostre no,
E si fos del plus gauzire,
Al dieu d'amor for'engals,
Q'el sieu paradis sui sals
Car vos sui hom e servire,
Qe·l sieu meillor san prezic!
Mas fals lausengier enic
M'ant tout als precs mains lezers,
Aissi·m tol mains gaugz temers.

Dompna, ·l bos conseills m'er mals
Qe·m detz, si no·m donatz als,
E car non l'aus contradire,
Don vos l'onrat conseill ric
De l'emperador, fredric,
C'aissi·m taing mais de plazers
Cum sui d'amans lo plus vers.

Lo rics pretz sobrecabls
De na Biatriz es tals
C'om no·l pot tot lauzan dire!
Mas endreig d'amor vos dic
De mon Bel Cavallier ric
C'a mais de pretz, et es vers,
Aissi n'ai'eu mos plazers