Tuich me pregon, Engles, qe vos don saut

Raimbaut de Vaqueiras

A vos, bona don'e pros, Ar pren camgat per tostemps de xantar, Ara pot hom conoisser e proar Ara·m digatz, Rambaut, si vos agrada, Ben sai e conosc veramen Conseil don a l'emperador, D'amor no·m lau, qu'anc non pogey tan aut Domna, tant vos ai preiada, D'una dona·m tueill e·m lais, Eissamen ai gerreiat ab amor El so que pus m'agensa Era·m requier sa costum'e son us Eras quan vey verdeyar Et oy Deu, d'amor Fauc per remembransa Forsat m'a encontra devet Gaita be, gaiteta del chastel, Gerras ni plaich no·m son bo Ges, si tot ma don'et amors Ja hom pres ni dezeretatz Ja non cujei vezer Kalenda maia Las frevols venson lo plus fort, Leu pot hom gauch e pretz aver Leus sonetz, No m'agrad'iverns ni pascors No puesc saber per que·m sia destregz Savis e fols, humils et orgoillos, Seigner Coine, jois e pretz et amors Senher n'Aymar, chauzes de tres baros Si ja amors autre pro non tengues Truan, mala guerra Tuich me pregon, Engles, qe vos don saut

Eissamen ai gerreiat ab amor
Co·l francs vassals gerrei'ab mal seignor,
Qe·il tol sa terr'a tort, per que·l gerreia,
E qan conois qe·il gerra pro no·il te,
Pel sieu cobrar ven puois a sa merce!
Et eu ai tant de joi cobrar enveia
C'ad amor qier merce del sieu pechat
E mon orgoill torn en humilitat.

Gauch ai cobrat, merce de la meillor,
Qe·m restaura la dan q'ai pres aillor,
E s'amistat per plaich d'amor m'autreia
Ma bella dompn'e per sieu mi rete
E.m promet tant per qe·l reprovier cre
Que ditz: qui ben gerreia, ben plaideia!
Q'en chantan ai ab amor gerreiat
Tant c'ab midonz n'ai meillor plait trobat.

El mon non a rei ni emperador
Q'en lieis amar non agues plaich d'onor,
Car sa valors e sos pretz seignoreia
Sobre totas las pros dompnas c'om ve,
Car mieills s'enanss'e plus gen si capte
E mieills acuoill e mieills parl'e dompneia,
E mostr'als pros son pretz e sa beutat,
Salva s'onor, e reten de totz grat.

Dompna, ben sai, si merces no·m socor,
Qu'eu non vaill tant qe·us taign'ad amador,
Car tant valetz, per que mos cors feuneia
Car non puosc far tant rics faitz co·us cove
A mi qe·us am! empero no·m recre
De vos amar, que vassals, puois derreia,
Deu poigner tant tro fassa colp honrat,
Per q'ie·us enquis pois m'aguetz conseill dat.

S'ieu non sui rics segon vostra ricor
Ni pro valens a vostra gran valor,
Mon poder fatz, e sui cel qe·us merceia
E·us serv e·us blan e vos am mais que re
E·m gart de mal e m'esfortz de tot be
Per vostr'amor, e mieills mi par que deia
Pros dompn'amar bon cavallier prezat
Endreich d'amor c'un ric outracujat.

Vostre beill huoill plazen, galiador,
Rizon d'aisso don eu sospir e plor,
E l'adreitz cors q'ades genss'e coindeia
M'auci aman, tals enveia m'en ve!
E si ab vos non trob amor e fe,
Mais no·m creirai en ren c'auia ni veia,
Ni·m fiarai en dompna d'aut barat,
Ni ja non vuoill c'autra.m don s'amistat.

Bels Cavalliers, vostr'amors mi guerreia,
E prec merce e franc'humilitat
C'aissi·us venssa cum vos m'avetz sobrat.

Na Beatritz, las melhors an enveya
De vostre pretz e de vostra beutat,
Que gensa vos e·l don de Monferrat.

Source: http://www.cam.org/~malcova/troubadours/