Savis e fols, humils et orgoillos,
Cobes e larcs e volpills et arditz
Sui qan s'eschai, e gauzens e marritz,
E sai esser plazens et enojos
E vils e cars vilans e cortes,
Avols e bos, e conosc mals e bes,
Et ai de totz bos aips cor e saber,
E qand ren faill fatz o per non poder.

En totz afars sui savis e gignos
Mas midonz am tant q'ie·n sui enfollitz,
Qe·il sui humils on pieitz mi fai e·m ditz
E n'ai orguoill car sai q'es bell'e pros,
E sui cobes c'ab son bel cors jagues
Tant que plus larcs en sui e mieils apres,
E sui volpils car no·n l'aus enquerer
E trop arditz car tant ric joi esper.

Bella dompna, tals gaugz mi ven de vos
Que marritz vauc car non vos sui aizitz,
Car per vos sui als pros tant abellitz
Qu'enojant s'en li malvatz enojos!
Be·m tenrai vil s'ab vos no·m val merces,
Q'ie·m tenc tant car per vos en totas res
Que per vilan m'en fatz als crois tener
E per cortes als pros tant sai valer.

D'amor dis mal e mas autras chansos
Pel mal qe·m fetz la bell'enfanairitz,
Mas vos, dompna, ab totz bos aips complitz,
Mi faitz tans bes q'esmenda m'es e dos,
C'amors e vos m'avetz tal ren promes
Que val cen dos c'autra dompna·m fezes!
Tant valetz mais, per q'ie·us vuoill mais aver,
E·us tem perdre e·us vuoill mais conquerer.

Jois e jovens et avinens faissos,
Dompn'e·l gens cors d'enseignamen noiritz
Vos ant pretz dat, q'es pels meillors auzitz,
E, per ma fe, si m'aventura fos
Q'ieu ni mos chans ni m'amors vos plagues,
Lo mieils de pretz auri'en vos conques
E de beutat, e puosc o dir en ver,
Que per auzir o sai e per vezer.

Bels Cavalliers, chausimens e merces
E·il fin'amors e·il sobrebona fes
Qez eu vos port mi deuria valer
Endreg d'amor, c'autre joi non esper.

Na Biatritz, vostre bel cors cortes
E·il grans beutatz e·l fins pretz q'en vos es
Fai gent mon chan sobre.ls meillors valer,
Cares dauratz del vostre ric pretz ver.