Compaignon, ab joi mou mon chan
Q'ieu ai respieich del joi q'ieu ai
Qe·m venra grans jois, si Dieu plai,
Qu'en gentil luoc met mon affan
E, s'ieu tot mi conort temens,
Jois es molt bels esperamens!
Per q'ieu no·m vuoil desesperar
Ni partir del doutz desirar.

En aqest desir vauc pensan:
Nuills hom non a fin pretz verai
Si d'amor non si met em plai
E cel que plus s'en met en gran
Per un ben n'a de mals dozens
E per un joi mil pessamens,
L'autrui tort l'er a plaidejar
E tener sen son follejar.

Fols fo cel c'apellet enan
Amor aquest mal q'ieu en trai:
Plang e sospir, plor et esmai,
Iras e dol, perdas e dan!
Et es enuois e marrimens
Amors, e fora chausimens
Si midonz forsses tant d'amar
Qu'il penses so qe·m fai pensar.

Ben pens de cortesia tan
Que res no·n es, ni eu non sai
On ja la trob, puois non es lai
On tuich m'autrejavon lo ban.
Ai bella dompn'et avinens,
Cortesia e Chausimens
Vos fezes tant humiliar
Qe·m fessetz calque ben·cuidar.

Ab sol lo cuich volgr'ieu chantan
Totz temps musar e tengra·m gai
Et autres gauzis, e·us lo pai
D'aco qe·us servirai aman!
E fora sals mos loncs atens,
Car ses vos m'es totz jois niens.
Grazitz sui ben -- si Dieus mi gar--
Per bona fe e per doptar.

On plus vos dopti e·us reblan,
Dobla l'orguoills e pieitz mi fai,
E gentils cors c'ab Merce·ill vai
Deuria fraigner son talan.
Mas aissi faill ben aquest sens
Que gentils etz vos e valens,
Et on eu plus vos puosc prejar
Ab Merce, vei l'orguoill doblar.

Doble joi agr'en la cort gran
Al jutgamen, qan lai serai,
On er saubut tot so de sai,
S'om disses de la plus prezan
Que fos tant qant ieu fui vivens
Qe·m fos de bels acuillimens.
Ben hi agra mes mon chantar
E·ls huoills si·ls li pogues donar.

Amics Bertrans, ja trop-amar
No voillatz ni lonc-esperar.