Mout chantera de ioi e voluntiers
Un leu sonet per dar m'esbaudimen,
S'ieu conogues que chans ni alegriers
Mi pogues dar al cor alegramen
C'usanssa es e totz temps l'aug retraire
Que s'alegron tuich li fin amador,
Qel iois d'amor es tant bos e tant fis,
C'om non a ben, mas cel q'es fis amaire.

Mas mi auci l'amoros desiriers
Quem ten et m'a tengut mout longamen;
C'ab bels semblanz e ab digz plazentiers
Me mis al cor lo fuoc d'amor arden
La plus bella qez anc nasques de maire;
qez anc nasques de maire;
Per qu'eu mi teing lo trebaill ad honor,
Et on plus art cum l'aurs plus fis deveing
Envers amor qem fai ira e maltraire.

E foram meills fos aillors mos penssiers
Don ieu agues calacom iauzimen,
Car ies de lai, on es mos cossiriers,
Non aten ieu mas ira e pessamen;
S'avrai aitant, car ill es la bellaire,
C'us bos espers adoussa ma dolor,
Quem promet ioi c'ab merce, so m'es vis,
Deu bon'amor trobar bons mercciaire.

Gais cors adreitz gens francs e vertadiers
Per dieu aiatz ves mi bon chausimen:
Que cum la naus que mena lo tempiers
Que sobrel mar sofre pena e tormen,
Ni a conseill si non dieu q'es guidaire,
Sui eu en gran perill per vostr'amor
E vos, dompna, ves cui estau aclis,
Traitz m'a bon port si cum etz debonaire.

Si bels lauzars mi fos pros ni mestiers
Ves ma dompna, ben agra bon talen;
Mas hom non pot dire tant es sobriers
Lo sieu ric pretz fin e car e valen
Que natura que tan gen la saup faire
Qan la formet plus bella e meillor,
Totz los bos aips del mon en lieis assis:
Per qu'ad autra mos cors nois pot atraire.

Mas a mos ops fo mals lo iorns primiers
Q'ieu vi la bella ab la cara rizen,
C'anc pois non fui de mos huoills parsoniers
Ni de mon cor c'ades mi vant fugen;
C'ab lieis ant pres lor luoc e lor repaire
E vas mi son fellon e traidor,
Que nom dizon de lieis ni joc ni ris
Ni novellas, don ja mos cors s'esclaire.

Domidieu prec q'es verais chapdellaire,
Seigne·n Monal, qu'el vos cresca honor
Eus don vencer totz vostres enemics
E cobrar l'er q'ac lo coms vostre paire.
Seigne·n Monal, non cre que tarze gaire
Que eu veirai en Raimon mon seignor,
Que longamen n'ai estat, so m'es vis,
Qu'el es de pretz capdels e governaire.