Vai, Hugonet, ses bistensa
Al franc rey aragones,
Chanta·l noel sirventes
E di·l trop fai gran suffrensa
Si qu'hom lo ten a falhensa!
Quar sai dizon que Frances
An sa terra en tenensa
Tan longamen e ses tensa,
E pus l'an aitan conques,
Agues de say sovinensa

E di·l que sa gran valensa
Se doblara per un tres
Si·l vezem en Carcasses,
Cum bos reys, culhir sa sensa!
E s'ilh atroba defensa,
Fassa semblan que greu l'es,
Et ab aital captenensa
Qu'ab fuec et ab sanc los vensa,
E genhs traga·n tan espes
Que murs no·y fassa·n guirensa.

E quar en aissi·s poiria
Acabar lur mals ressos
Que dizon, senher, de vos
Fals Frances, que Dieus maldia
Quan no venjatz la forhia,
E quar etz tan vergonhos,
No·m cal pus apert o dia!
Paratges s'en revenria
Que·s perdet totz say mest nos
Que neyssas no·y conosc via.

Elms et ausbercx me plairia,
Et astas ab bels penos
Vissem hueymais pels cambos,
E senhals de manta guia
E que·ns visson, ad un dia,
Essems li Frances e nos
Per vezer quals mieils poiria
Aver de cavalhairia,
E, quar es nostra razos,
Cre que·l dons ab els n'iria.

Pros coms, marques de bon aire,
El camp feren e donan
Fos restauratz lo greu dan,
Agratz cobrat manht repaire...