S'a dreg fos chantars grazitz,
Ben chantera pus soven!
Mas vejair'es a la gen
Que totz trobars si'enguals,
Per qu'ieu no·i seria sals,
Qu'ie·n vuelh grat de las melhors,
S'entrels desconoissedors
E domnas de mals talans
Sovendejava mos chans.

Qu'ieu sai so que quasqus ditz
Al plus celat parlamen,
Quan per lur descauzimen
Fan creir'a domnas manhs mals
E donan los cosselhs fals
Que no sofran trobadors
So don gen se sierv Amors!
Qu'a selhuj tanh mielhs demans
Que mais a d'aips benestans.

S'es larcs, cortes et arditz
E sap servir d'avinen,
Sos chans qual dona·l defen
Vers es que trobars ses als
Non es proeza cabals
Ni sol us mestiers valors!
Pero corteza lauzors,
Bendigz et onratz bobans
Es de totz bos pretz enans.

D'aisso·m tenh per enrequitz
Quar la belh'en cuj m'enten
Conoys qui·lh ditz ver o·lh men,
Per que·l sui del tot leyals!
Qu'amix leugiers ni venals
Non pren d'onrat luec secors.
Doncs pus tan me platz l'onors,
Em patz dey suffrir los dans,
Que·l pros m'en semble plus grans.

Si·m fas ieu qu'als pus falhitz
Son de belh captenemen
E·n parl'essenhadamen
Ab mos enemix mortals,
Qu'a penas conoisso quals
De lor en tenc per pejors!
E non es tan greus dolors
A drut, ni pus durs afans
D'onrar lauzengiers truans.

Domna, vos m'etz del tot guitz,
Qu'ieu non ai foldat ni sen
Mas al vostre mandamen.
Tan m'es lo dezirs corals
Q'us ans me sembla jornals!
Si·m fai loncs atens paors
E si·m par mos chans forhors,
Qu'en domney ses totz enguans
Es greus termes de tres ans.

Mais d'amic, d'autras ricors,
Que·us semblarian majors,
Vos val Miravalh dos tans,
Quar l'avetz ses totz engans.

N'Audiartz, totas valors
Daura domneys et amors,
E no·us segra mais balans,
Pus a vos platz que s'enans.