Una chanso ai faita mortamen

Peire Vidal

A per pauc de chantar no·m lais, A per pauc de chantar no·m lais, Ab l'alen tir vas me l'aire Ajostar e lassar Amors, pres sui de la bera, Anc no mori per amor ni per al, Atressi co·l perilhans Baron, de mon dan covit Baron, Jhesus, qu’en crotz fon mes Be m’agrada la covinens sazos Be·m pac d'ivern e d'estiu Bels Amics cars, ven s’en ves vos estius, Ben aja ieu, qar sai cobrir Ben viu a gran dolor Bon'aventura don Dieus als Pizas, Car'amiga dols'e franca, De chantar m’era laissatz Dieus en sia grazitz D'omes honratz, per qu'ieu fatz Drogoman senher, s'ieu agues bon destrier, Emperador avem de tal manera, En Pelicer, chausez de tres lairos, En una terr'estranha Estat ai gran sazo Ges del joi qu'ieu ai no·m rancur, Ges pel temps fer e brau, Ges quar estius La lauzet'e·l rossinhol Molt m'es bon e bell, Mos cors s'alegr'e s'esjau Mout es bona terr’Espanha Neus ni gels ni plueja ni fanh Non es savis ne gaire ben apres Nulhs hom non pot d'amor gandir, Peire Vidal, pos far m'ave tenso, Per mielhs sofrir lo maltrait e l'afan Per ses dei una chanso Plus que·l paubres, quan jai el ric ostal, Pus tornatz sui em Proensa Pus ubert ai mon ric thesaur, Quant hom es en autrui poder, Quant hom honratz torna en gran paubreira, Si saupesson mei oill parlar, Si·m laissava de chantar S'ieu fos en cort on hom tengues dreitura, Son ben apoderatz Tant ai lonjamen sercat Tant an ben dig del marques Tant me platz jois e solatz Tart mi veiran mei amic en Tolzan Una chanso ai faita mortamen

Neus ni gels ni plueja ni fanh
No·m tollon deport ni solatz,
Que l'escurs temps mi par clartatz
Pel novel joi en que·m refranh!
Que joves dona m'a conques,
E, s'ieu lieis conquerre pogues,
Quan la remir, tam bella·m par,
Que de gaug cug ades volar.

Mas l'austors qu'om pren en l'aranh,
Qu'es fers entro qu'es domesiatz,
Pueis torna maniers e privatz,
S'es qui·l tenha ni gen l'aplanh,
Mout val mais d'autre quant a pres!
Tot atrestals uzatges es,
Qui jove dona vol amar,
Que gen la deu adomesgar.

A l'uzatge·m tenh de Galvanh
Que quan non son aventuratz,
Ieu m'esfortz tan deves totz latz
Qu'ieu prenc e conquier e gazanh.
E si mos afars m'avengues
D'aisso de que·m sui entremes,
A mon emperi ses duptar
Feira tot lo mon sopleyar.

Ab pauc de fuec romp l'aur e franh
L'obriers tro qu'el es esmeratz,
Don l'obra es plus bell'assatz:
Per que los loncs maltragz non planh.
E si·l fuecs d'amor s'enprezes
En lieis si cum e me s'espres,
De ben novel pogra cantar!
Mas hom no·s deu dezesperar.

Ab bonas donas m'acompanh
E platz me jovens e beutatz
E platz me cors gen faissonatz!
Mas no mi platz bars que·m reganh
Ni que trop li dur sos arnes!
Qu'ieu·n sai ben tals dos o tals tres,
Qu'om pot per ver-vilas comtar,
Ab sol que los auja nomar.

A drut de bona dona tanh
Que sia savis e membratz
E cortes ez amezuratz,
E que trop no·s trebalh ni·s lanh.
Qu'amors ab ira no·s fa ges,
Que mesura d'amor fruitz es,
E drutz que a bon cor d'amar,
Deu·s ab gaug d'ira refrenar.

Las aventuras de Galvanh
Ai totas e d'autras assatz!
E quan sui en caval armatz,
Tot quan cossec, pesseg e franh.
Cent cavaliers ai totz sols pres
Et ai agut tot lur arnes!
Cent donas ai fachas plorar
Et autras cent rir'e jogar.

Ar ai conquist sojorn e banh
A Mauta, on sui albergatz
Ab lo comt'Enric, de que·m platz,
Que negus bos aips no·l sofranh.
Adregz es e larcs e cortes
Et estela dels Genoes,
E fai per terra e per mar
Totz sos enemics tremolar.

Ab lo comt'Arman m'acompanh
Quar es francs e ben ensenhatz,
Tot autressi com si fos natz
A Tholosa part Caramanh.
Ardiment a d'Aragones
E gai solatz de Vianes,
E sembla me de domneyar
E·l rei de Leo de donar.

Ieu sui senher dels Genoes,
Que·ls grans e·ls paucs ai totz conques!
Li gran mi fan tot mon afar
E·l pauc m'onron e·m tenon car.

Source: http://www.cam.org/~malcova/troubadours/