Ben teinh per fol e per muzart
Cel qu'ab amor se lia,
Quar en amor pren peior part
Aquel que plus s'i fia:
Tals se cuida calfar que s'art.
Los bes d'amor a hom a tart
E·ls mals a cascun dia.
Li fol e·l fellon e·l moyssart
Aquil an sa paria:
Per qu'ieu m'en part.

Ja ma mia no mi tenra
Si ieu leis non tenia!
Ni ja de mi non jauzira
S'ieu de leis non jauzia.
Conseilh n'ai pres bon e certa:
Farai li segon que·m fara.
E s'ella mi galia
Galiador mi trobara,
E si·m vai dreita via
Ieu l'irai pla.

Anc non gazainhei tan gran re
Con quam perdei ma mia:
Quar, perden leis, gazainhei me,
Qu'il gazainhat m'avia.
Petit gazainha qui pert se,
Mas qui pert so que dan li te
Ieu ore que gazainhs sia.
Qu'ieu m'era donatz per ma fe
A tal que·m destruzia
Non sai per que.

Donan me, mes en sa merce
Mi, mon cor e ma via--
De leis que·m vira e·m desmante
Per autrui e·m cambia.
Qui dona mais que non rete
Et ama mais autrui que se
Chauzis avol partia,
Quan de se no·ilh cal ni·l sove
E per aco s'oblia
Que pro no·ilh te.

De leis pren comjat per jasse
Que jamais sieus non sia!
Qu'anc jorn no·i trobei lei ni fe
Mas engan e bauzia.
Ai doussors plena de vere,
Qu'amors eissorba sel que ve
E l'osta de sa via,
Quant ama so qu'ilh descove
E so qu'amar deuria
Gurp e mescre.

De leial amia cove
Qu'om leials amics sia
Mas de leis estaria be
Qu'en galiar se fia
Qu'om galies, quan sap de que.
Per qu'a mi plai quan s'esdeve
Qu'eu trob qui la galia,
E garda sa onor e se
De dan e de folia
E·il tira·l fre.