Al prim comens de l'ivernaill
Qand plovon del bosc li glandutz,
Vuoill c'om s'engaill
De Proeza, que non tressaill,
E que n'esti'amanoitz
Aissi cum s'era·l temps herbutz.

Ladoncs quecs avols hom se plaing
Qand ve·l temps frei e las palutz,
Contra·l regaing,
Que·is avil'e met en bargaing
Qu'en estiu que non es vestitz
Pot anar d'una peilla nutz.

Aquist fant semblan a tahi
Al ser quan son plen e pagutz,
Apres lo vin,
E no lor ne soue·l maitin,
Anz jura·l senros acropitz
C'anc tan lagz temps non fo vehutz.

Joves homes de bel semblan
Vei per Malvestat deceubutz!
Que van gaban
Dizo, mil essais encogan:
Farem qan lo temps er floritz,
Mas lai reman lo gabs e·l brutz.

Cill ant l'usatge del gosso
Que ditz qand sera a la lutz
Fara maio,
Puois qand es lai qui l'en somo,
Non er escoutatz ni auzitz,
Anc per lui non fo dolatz fustz.

Moillerat, li meillor del mon
Foratz, mas chascus vos faitz drutz,
Que vos confon
E son acaminat li con
Per qu'es Jovens forabanditz
E vos en appell'om cornutz.

Lo pretz del dan e del barat,
De calque part sia vengutz,
Ant moillerat!
Et ieu ai lo lor autreiat,
E Jois es entr'els esbauditz
E Donars alqes mantengutz.

A tort o a dreig vant dessus
E Jovens se clama vencutz!
Li mais e·l plus
A penas trobo qui·ls gratus!
Capel s'a levat d'avols critz
Uns per un bou que n'a agutz.