Tot a estru

Marcabru

A la fontana del vergier, A l'alena del vent doussa Al departir del brau tempier, Al prim comens de l'ivernaill Al son desviat, chantaire, Amics Marchabrun, car digam Ans que·l terminis verdei Assatz m’es bel el temps essuig: Auias de chan com enans’e meillura Bel m’es can s’esclarzis l’onda Bel m’es cant son li frug madur Bel m’es qan li rana chanta Bel m’es quan la fueill’altana Bel m'es quan la fuelh' ufana Cortesamen vuoill comensar D’aiso laus Dieu Dirai vos e mon latin Dirai vos senes duptansa Dire vos vuoill ses doptanssa Doas cuidas ai compaignier Emperaire, per mi mezeis, Emperaire, per vostre prez En abriu, s'esclairo·il riu contra·l Pascor, Estornel, cueill ta volada; Ges l’estornels no·n s’ublida Hueymais dey esser alegrans L’autrier, a l’issuda d’abriu, Lan qan cor la doussa bisa, Lanquan fuelhon li boscatge L'autrier jost' una sebissa L'iverns vai e·l temps s'aizina Lo vers comens quan vei del fau Lo vers comenssa Mantengutz e Jois eisamens, Pax in nomine Domini! Pax in nomine Domini! Per savi·l tenc ses doptanssa Pois l’inverns d’ogan es anatz Puois la fuoilla revirola Pus la fuelha revirola Pus mos coratges s'es clarzitz Pus per un cosselh descrec Pus s’enfulleysson li verjan, Quan l'aura doussana bufa, Seigner n'Audric, Soudadier, per cui es jovens Tot a estru

L'iverns vai e·l temps s'aizina
E reverdej'il boisso,
E par la flors en l'espina
Don s'esjauzen l'auzello:
Ai
Ja deven hom d'amor gai,
Chascus vas sa par s'atrai,
Hoc,
Segon plazenssa corina.

Lo freitz frim e la bruina
Contra la gentil sazo!
Pels plais e per la gaudina
Aug del chan la contensso!
Ai
Ieu·m met de trobar en plai,
E dirai d'amor cum vai,
Hoc,
Si·m vuoill e cum revolina.

Amars creis et atahina
Tric'ab coratje gloto
Per una dolssor conina
Que·is compren d'un fuoc fello!
Ai
Ja non er nuills s'i dechai
D'averas o per assai!
Hoc,
No·i lais del pel en l'arsina.

Bon'Amors porta meizina
Per garir son compaigno,
Amars lo sieu disciplina
E·l met en perdicio!
Ai
Tant cant l'avers dura, sai,
Al fol, semblan d'amor fai,
Hoc,
E quan l'avers faill buzina.

Gent cembel fai que trahina
Ves son agach lo brico,
Del cim tro qu'en la racina,
Entrebescat hoc e no!
Ai
Tal amei blanc brun e bai
Ab si farai no farai
Hoc,
Fai al fol magra l'esquina.

Dompna non sap d'amor fina
C'ama girbaut de maiso,
Sa voluntatz la mastina
Cum fai lebrieir'ab gosso!
Ai
D'aqui naisso·ill ric savai
Que no fant conduit ni pai!
Hoc,
Si cum Marcabrus declina.

Aquest intr'en la cozina
Coitar lo fuoc el tizo
E beu lo fum de la tina
De si donz na Bonafo!
Ai
Ieu sai cum sojorn'e jai
E part lo gran e·l balai,
Hoc,
Son seignor engirbaudina.

Qui bon'Amor a vezina
E viu de sa liurazo,
Honors e Valors l'aclina
E Pretz sens nuill'ochaio!
Ai
Tant la fai ab dig verai
Que no·il cal aver esmai
Hoc,
Del trut dullurut n'Aiglina.

Ja non farai mai plevina
Ieu per la troba n'Eblo,
Que sentenssa follatina
Manten encontra razo!
Ai
Qu'ieu dis e dic e dirai
Quez amors et amars brai,
Hoc,
E qui blasm'Amor buzina.

Source: http://www.cam.org/~malcova/troubadours/